في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.
لالة دنيا، لاحظنا زيادة ملحوظة في وزنك وتغييرا في ملامحك، ما السر في ذلك؟
واهيا نااري شحال كاتزيدو فيه، ماشي شي تغييير غير شوية البوتوكس والفيلر.. أما الغلض اللي تابعيني عليه راه من عند الله مون مورا ما ولدت… شنو بغيتيني نقولك الطبي..، عفوا بغيت نقول السر ديالو زعما؟ راه مايمكنش هههه… ياكما بغيتي كولشي يغلاض ويزيان بحالي، لالا أنا كايعجبني التميز والتفرد فكولشي، علاه أنا غير جيت ولقيت الحل للنحافة، ياك أختي ماخلاو ماقالوا فيا مني كنت ضعيفة حتا تعقدت، ودابا مني غلاضيت وزيانيت بغاو ياخذو السر بهاد السهولة، ياحليلي، أكيد لا… خليهم فالماكلة والنعاس والحلبة و”البكبوكة” عالله وعسى .
ماذا عن بياض بشرتك ؟
الفلوس أختي، الفلوس هي اللي كاتبيض وتزين… يكذب عليك الكذاب يقوليك الوصفات الطبيعية، ماكين غير التقشير التقشير والعناية بآخر ما كاين فتقنيات التبييض والتفتيح للبشرة، يسحابليك غير آجي وبياضي… خليني من داكشي ديال الروز ودانون مسوس راه غا كايكدبو عليكم بيه هههه…
اتجهت مؤخرا نحو إحياء الأعراس والحفلات الخاصة بدل الطرب ؟
إيوا من مورا قضية “حمزة مون بيبي” ما بقا حد كايعيط لي، وزايدون حبسوني هنا فالمغرب مني حيدو لي الباسبور، آش بغاوني ندير، نبقا بلا خدمة ونسد عليا فالفيلا ديالي ونتكمش ؟ مايمكنش، كان ضروري نخدم باش ندخل الفلوس، وأصلا راه كيف هنا كيف لهيه… كان كيحسابلي المغاربة مايقدروش على الكاشي ديالي، عكس الخليجيين اللي كنت كانغني ليهم فالأعراس، ولكن اتضح أنني كنت غالطة. تبارك الله كاين العائلات المغربية اللي كبروا بيا وماكبروش فيا المبالغ الخيالية اللي كانتخلص بيهم، أدهشوني الصراحة، وديما كانقولها راه ماكاينش بحال بلادنا وخيرها اللي مايديه غيرنا.
ولكن اللي كانعرفوه عليك، أنك مامحتاجاش للفلوس؟
ههه، الله يهديك واش كاين شي واحد كايشبع من الفلوس… صحيح أنني جمعت شي بركة بفضل المسار الفني والمشاريع ديالي والأعراس والحفلات الخاصة اللي كنت كانحييها فالخليج، ولكن الصراحة داكشي ماكافيش، أنا تعودت على حياة البذخ والترف وهازة مسؤولية عائلة على قدها… عاد زيد عندي مصاريف كثيرة، يسحابليك غير آجي وبياضي وزياني وغلاضي، راه مني كاتدخلي للمعمعة ديال التجميل خاصك ما هي وما لونها، هاذ الميزاجور اللخرة اللي درت راه كاتحتاج بزاف ديال الفلوس والعناية والترميم المستمر، وإلا ماكانوش عندك الفلووس راه بحالا شي مادرتيه.
ماذا علمتك أزمة “حمزة مون بيبي”؟
علماتني ندخل سوق راسي، ونديها فخدمتي ونشد فمي من المعاطية والخلافات مع الفنانين وشد لي نقطع ليك… علماتني مانعاودش ندير التيقة فالصحاب، حيث نهار كاطيحي ماكايعقل عليك تا واحد فيهم، وحتى أقربهم ليك كايبيعوك ويغدروك بلا تردد .. علماتني نميك ونتفيك ونتشيك ضد فالعديان وفگاع هادوك اللي كايتسناوني إيمتا نطيح باش يشمتو فيا … علماتني نولي نحسبها مزياان وحتى إذا استفزني شي حد نولي نضرب غير من لتحت، حسي مسي وغير بالبارد…
فين وصلات القضية ديالك؟ واش نتي خرجتي براءة ولا ما زال مهددة بالحبس؟
الله يا ختي آش بغيتي عندي؟ آش هاد الفال المعوج؟ السلامة على بشار… باغا تجبدي عليا النحل. الجواب داه معاه النقيب بوعشرين الله يرحمو… باراكا ختي دخلات للحبس.
