“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

حوار اليوم مع سامية أقريو، ممثلة ومخرجة مسلسل “دار النسا”:

*لالة سامية أقريو، لاحظنا بللي المسلسل ديالك “دار النسا” كانو فيه أخطاء كارثية. كيفاش مرديتيش البال، لا فتصوير لا فمونتاج وخليتي هادشي داز؟
شني عندكم كتضخمو الأمور. الميكروفون بان، دوزوها. خطأ واحد ماشي مشكل. راه الإنسان يعيا ما يحضي وكيتقولب. سبحان من لا يسهى ولا ينام.

*واخا. ندوزو الميكروفون. وداك الطاكسي اللي خرج من طنجة بماتريكيل د-40 ووصل لمراكش بماتريكيل ب-20؟
أنا كمخرجة كنبغي نخدم على التفاصيل. ومراكش مدينة فيها الصهد وهادشي علاش الطاكسي طيح الأرقام فالطريق. هادي راه خاصني ناخد عليها أوسكار. ولكن للأسف مكتقدروش الإبداع، وكتحكروني حينت أنا مرا وجاية من مدينة صغيرة.

*بمناسبة أنك جاية من مدينة صغيرة. علاش معطيتيش فرصة لشباب شماليين يكونو فالمسلسل ديالك. على الأقل ما كناش نشوفو اللهجة الشمالية كتبهدل بديك الطريقة اللي فالمسلسل؟
كتهضر على ربيع الصقلي؟ وا الصراحة كيبغيوه لعايلات، وعندو إنستغرام فيه بزاف ديال المتابعين. عيطت ليه باش حتا إيلا المسلسل مصدقش نطلعو غي إنستغرام بستوريات لي كيدير النهار كامل فالتصوير وندبر حتا أنا على الإشهارات.

*واش ما كفاكش هادشي كامل؟ هانتي مخرجة هانتي ممثلة كديري الإشهارات فالتلفزة وطامعة تزاحمي الناس ديال الويب؟
قل أعوذ برب الفلق. خمسة وخميس عليا. آه.. ندير الإخراج والتمثيل والإشهارات فالتلفزة وفالأنترنت وحتا لايف فتيكتوك. مالها ما تجيشي معايا. بقاو تابعيني..

*لا تجي معاك. غي هو تيكتوك فيه مولينيكس نخاف عليك. المهم عارف راسي عيقت عليك. هذا آخر سؤال، كيفاش قدرتي تخدمي هادشي كامل وديري الإخراج لمسلسل فتلفزة ونتي عاد قلتي بسم الله فلوقت لي مخرجين قدام فدومين وسميات كبار جالسين بلا خدمة فديورهم؟
كيقوليك المثل اللي عندو خالتو فلعرس مايبقاشي بالجوع، وأنا ضربت تمارة وتعذبت. ودابا عندي مول لعرس ماشي غي خالتي. خليونا تا حنا ناكلو شوية. ودوك المخرجين لي هضرتي عليهم راه هوما لي مكيبغيوش الماكلة ديال لعراس.