“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.
محمد الترك مرحبا بيك.. الحوار ديالنا اليوم هيكون بالدارجة عارفك كتفهمها وكتهضر بيها مزيان. متافقين؟
هلا.. طبعا أنا الدارجة المغربية كنعرفها بزاف. خود راحتك.
درتي لايف قلتي فيه بلي باطمة هتخرج بعفو ملكي وكتقول متأكد من المعلومة، نقدرو نعرفو شكون هاد المصدر الواعر ديالك ؟
وبما أنه عيد الأضحى قرب، قلت هاد الهضرة وصافي، صدقات هنبان واعر. مصدقاتش الناس كتنسى أصلا.
هو صراحة نفس لحاجة لي قلت بيني وبين راسي حتا أنا، ولكن علاش كل مرة طالع فلايف تعاير دنيا. ياك طلقتو وسالا الفيلم؟
هذا هو المشكل. الفيلم مسالاش عندي، دنيا رزقي وأنا لي رجعتها نجمة وتزوجت بيها فالوقت لي كولشي كان كيطنز عليها، ويضحكوا على الشكل ديالها وقبلت بيها هكاك وعاونتها وعرفتها شنو هو الخليج وفلوس الخليج. فلخر تخليني وتمشي بلا مانربح موراها، فدابا كنطلع بيها التفاعل على ماترجع ليا أو نلقى شي باطمة أخرى.
هو كاينين ناس كيقولو بلي انت من الأسباب لي خلاو دنيا ماديرش مسار فني كبير حينث زربتي عليها فالبدايات وبيقيتي دور بيها فلعراس وضرب بيها لفلوس وفلخر السيدة ضيعت كاريير ديالها. آش بان ليك فهاد الهضرة؟
شوف أنا الهدف ديالي هو لفلوس. ودنيا بالصوت ديالها عرفت بلي هنجيب منو الذهب. وفعلا هادشي لي وقع. أنا بنتي وما زكلتهاش وخدمت بيها بقات ليا غير دنيا.
وبالنسبة لديك لمعاطية لي كدير فلايفات واش هادشي كيبان ليك رجولة؟
أنا عندي جوج حوايج فالحياة ديالي، يا معايا أو عدوي، ودنيا ملي خلاتني وغادا كدور ليا فطنجة وتخدم وماتقسمش معايا لغرامة عادي هنفضحها وطبعا من الرجولة أنه نفكرها بلي مكان عندها متاكل قبل مانعرفها وأنا لي نقيتها وعطيتها قيمة وهادشي مخاصهاش تنساه لا هي لا العائلة ديالها.
واش فراسك بلي هادشي لي كتقول راه كيضرك انت اللول قبل منها، كيفاش واحد كيقول بلي مرتو كتمشي ودير وتفعل وهو ساكت؟
كنت كا ناكل منها فليسات صحيحة. أما ملي تولي تخدم وانا فالدار ما عارف والو وماينولنيش من الحب نصيب، فعلي وعلى أعدائي.
صراحة عمرني شفت شي مشوه فحالك، وبكاع لمصايب ديال باطمة ولكن باز ليها كانت عايشة معاك، نقولو دنيا خايبة ومرتك اللولة وبنتك لي حتا هي درتي معاها نفس القضية. واش انت مدوز حياتك كتجيب لفلوس على ظهر لعيالات أو كيفاش؟
كيقوليك اتق شر من أحسنت إليه، ولعيالات يا خوي كيكونو فاللول مزيان بزاف، كيوليو يدخلو لفلوس ويديرو شوية ديال الشهرة كينساو الخير وينساو شكون لي وصلهم.
بلا عاطفة باش تبان للناس ظريف ومظلوم المشكل فيك حينث لا يمكن أنه هاد الناس كاملين خايبين وانت لي زوين، لمهم دابا شنو الخدمة ديالك؟
حاليا معندي خدمة من غير لايفات على دنيا بطمة، وكنقلب على ضحية آسف زعما فنانة جديدة لي نتزوج بيها وندخل بيها فلوس حينث خوك لفلوس لي جمع من لحفلات ديال دنيا تقاداو ليه فالكازينو وحتا التيكتوك لفلوس ديالو قليلة مقارنة بالمستوى المعيشي ديالي فالله يجيب شي صوت جميل لي ندخلو منو لفلوس.
حشمت فالصراحة نقوليك شنو السمية ديال هادشي لي كدير ولكن حتا لي غادي تيق فيك مور هادشي لي كدير سرها نيت. بسلامة.
محمد الترك: الزوج السابق ومدير أعمال دنيا بطمة سابقا