“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

السي المنظم مرحبا بيك، كنضن شفتي المغنيين لي خرجو هاد ليامات كيتشكاو منك. آش بان ليك فهادشي؟
آه شفتهم خارجين كيتشكاو وكيقولو شي هضرة ماعندها لا ساس لا راس. هاد المغنيين عزيز عليهم الدراما ولبكا.

صراحة بان ليا عندهم الحق، ممكن تشرح لينا كيفاش كتبرمجو الفنانين لي كا يكونو فالمهرجانات؟
ساهلة. لي داير ليا فولو فإنستغرام، وكيكون هو أو المنادجر ديالو صاحبي كنعيط ليه.

كتهضر بصح؟
لا غي ضاحك معاك، كنشوفو المهرجان شحال مخصص ديال لفلوس، وشكون الجمهور لي مستهدفين وهاكا كنحددو شنو النوع الموسيقي لي يصلاح وشكون هوما الفنانين لي كيديروه، راه ضابط الأمور ديالي متخافش عليا.

هادي هضرة مزيانة، ولكن علاش كتجاهلو المغنيين لي كيخرجو موسيقى وباغينهم الناس، وفلمقابل كتجيبو وحدين كتعرفوهم غي نتوما أو سالاو موسيقى فالسبعينات؟
حينث هادو لي كتهضر عليهم وقلتي ناس باغينهم خاصك تواصل مع المنادجر ديالهم، ويبقى يفهم عليك فلكونترا والثمن ويقوليك خاص الماتريال لفلاني والمنصة يكون فيها ضو بهاد الطريقة وفيهم غي لفهامات الخاوية والنفاخة، فكنعيطو لناس لي كيقبلو بلي كان ويجي يغني وفرحان وكيتعاونو معانا مساكن لدرجة فنان عيطنا ليه نهار المهرجان ومسكين جا مردهاش لينا فوجهنا.

ولكن هادشي راه عشوائية، الفنان خاصو يتعلم بمدة ماشي نهار بنهارو. وكنضن هادشي لي كديرو ملي كتجيبو فنانين عرب أو حتا هوما كتعلموهم بين ليلة ونهار؟
هو صراحة على حساب الفنانين العرب لي عايشين فالمغرب هادوك دياولنا لوقت لي علمناهم مكيخسروش لينا. أما فنانين كبار فحال نجوى كرم أو راغب علامة هادو كياخدو لينا المفاوضات معاهم الوقت والفلوس.

مفاوضات؟ هتحلو أزمة الما.. غي باش تكون فراسك راه غي نتوما لي مزال كتشوفوهم فنانين كبار. واش ما عارفش لمغاربة راه كيسمعوا للفنانين ديال البلاد كثر من هادو؟  
سمح ليا فهادي مامتافقش معاك. واش هتقارن راغب علامة بمغني مغربي؟ من نيتك؟

غير انت لي مزال عندك عقدة الأجنبي. المهم المهرجانات الجايين ناويين تبدلو هاد السياسة ديالكم ولا مكاينش أمل؟
كاين آمال وحياة تا هيا.. هو مكاين مايتبدل. حنا خدامين وهاد طريقة مسلكانا ومخليانا بخير. غي تبعدو علينا نتوما لي فيكم لفهامة وكولشي يدوز مزيان. والمهرجانات الجايين غادي نعيط ليك إيلا كتعرف شي فنان نطلعوه يغني وهنينا.