“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.
مرحبا بيك أخاي لfan ديال حسن نصر الله. البركة فراسك والله يبدل محبتو بالصبر. كي بقيتو من جيهتو؟
شكرا ليك ومامشا معاك باس. مشا شهيد سعداتو.
المهم بعيد على هاد شهيد لي كتفرقو فيها بحساب لݣانة ديالكم، واحد السؤال خفيف بعدا. واش انت شيعي؟
لا ماشي شيعي. أنا سني. علاش؟
كنعرف بلي الشيوخ ديال السنة كيكفرو الشيعة وكيقولو بلي هوما أخطر وحدين على الأمة. ودابا كتمجدو فنصر الله. كيفاش هاد القضية؟
حينث حسن نصر الله كينصر الإخوان ديالنا ففلسطين، وهو الوحيد لي واقف لإسرائيل وكايتحارب معاهم. فبإسم الإنسانية خاصنا نحتارموه بغض النظر على واش شيعي أو سني أو حتا مجوسي.
واخا وبالنسبة للمجازر لي دارها فعدد من الدول فحال سوريا لي قتل فيهم مدنيين لي منهم رجال كبار ودراري صغار وعيالات هداكشي هانية؟
شوف فلسطين هي القضية المهمة عندنا ولي وقف معاها نحطوه فوق الراس واخا يدير لي دار.
واخا ياك سيادتكم مغربي بعدا؟
طبعا مغربي ولي قرب ليا لبلادي نحيدو من فوق الأرض.
إيوا راه حسن نصر الله والحزب ديالو راهم كيساندو البوليزاريو ولا حتا فهادشي المهم هي فلسطين؟
شنو؟ لا ولكن راه أي واحد كيكونو عندو تقديرات لي يقدر يغلط فيهم وهايكون غي كدموه إيران فهاد القضية.
على هو حسن نصر الله ماشي غي “بيدق” فيد إيران؟
لا ماتقولش على الشهيد هاد المصطلح حينث ماشي بصح وعمرو كان كيخدم أجندة ديال حتا شي حد.
واخا آسيدي.. واجي هاد أنه كيحارب إسرائيل لي صدعتونا بيها. صوارخ ديال عيشورة لي طلق عليهم ممكن تقولي شنو الأضرار لي دارت؟
شو ماكانوش أضرار، ولكن راه على الأقل سيد كيصيفط. هوما كيحبسوهم قبل مايوصلو عندهم على قبل عندهم سلاح متطور كثر.
واخا هو راه مكيديرو والو حينث كيعلمهم قبل ولكن ندوزها ليك آ سيدي.. دابا قولييا كيفاش وليتي fan ديال نصر الله؟
صراحة أنا مكنت كنعرف والو عليه حتال هاد الأواخر الله يخلف على الجزيرة تبارك الله عليهم دوك ناس كيعطيو الأخبار كيما خاصها تكون. أحسن تلفازة فالعالم.
الجزيرة؟! .. خويا سير الله يرد بيك يلاه تلحق عاشورة.
أواه.. ياك يالاه دازت ورا العيد الكبير.