“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

خاي زياش مرحبا، كولشي بخير؟
الله يحفظك، هاد الساعة مزيان. راك عارف شوية ديال المشاكل ولكن بخير.

وهاد المشاكل بداو قبل سطوري لي درتي فإنستغرام أو قبل؟
هي قبل. ولكن كان داكشي حدو الكورة وصافي، راك عارف تشلسي كنت مكنلعبش من بعد مشيت لتركيا باش نرجع رسمي وفاللخر تعاود نفس السيناريو. أما ديك ستوري ديال إنستغرام لي كتهضر عليها حريرتها بوحدها.

شنو القصة ديال ديك ستوري وشنو قالك راسك خشيتي الحكومة ديالنا حتا هي؟
شوف باش نجيك من اللخر. أنا فحالي فحال كاع الناس كنتحمس. وهادشي لي وقع ماعجبنيش. داكشي لي كيوقع في فلسطين نهار كامل وانا كانشوف ناس كتموت فدرت ديك ستوري وانا براسي ماعرفتش بلي داكشي لي كتبت تخربيقة حتا داز شوية ديال الوقت ومسحتها.

ولكن واخا مسحتيها راه هزوها ناس خرين وبقات كدور. وحتا الجيران ستاغلوها وبداو كيروجو ليها بطريقة لي كضر مصلحة لبلاد وكان من المفروض أنك على الأقل دير ستوري اخرى لي تشرح لناس وتعتاذر فيها. أو لا؟
وا شوف. انا راه ما كانفهم والو فهادشي ديال السياسة. وبغيت نعتاذر ولكن فنفس الوقت راك عارفني صعيب نعتاذر، ماشي حينث مابغيتش ولكن مكايعطينيش خاطري. وبيني وبينك، كنت كنقول هدوز شوية ديال الوقت وغادي ينساو الناس ولكن لقضية وصلات حتا للمنتخب مابقاوش كيعيطو ليا وهادشي قلقني. بسبب سطوري نساو داكشي كامل لي درت.

بغيتي تقصد بلي الركراكي ماعيطش ليك على قبل هادشي؟
هادشي لي بان ليا، حينث المرة اللولة قال راه مضروب، دوزناها بجغمة ديال الما، ودابا أنا مامضروب ماوالو، واخا هاكاك ماعيطش ليا. شنو المعنى ديال هادشي؟

ممكن يكون بسبب أن المستوى ديالك ناقص مؤخرا؟
الركراكي ماشي من هاد النوع ديال المدربين لي كيدير على المستوى. أصلا هو تكون معاه غي مزيان يجيبك للمنتخب. وراك كتشوف أنا كنلعب مرة مرة مع الفرقة ديالي، كاين اللي أصلا نساوه فرقتو واش معاهم ومع ذلك كيعيط ليه. وباش من عميد الفريق لمايحاشيهاش لييا، هنا القضية فيها إن.

حاولتي تواصل معاه باش تعرف شنو السبب لي خلاه مايعيطش ليك؟
شناهوا؟ أنا الاعتذار ومادرتوش عاد نحاشيها ليه. راني زياش، مكانسولش. وعاد هادا الدور ديالو هو لي كيصدعنا نهار كامل بنتوما خوتي وحنا عائلة، ولا هادشي كيقولو غي قدام الكاميرا؟ وحتا أنا معطلتوش. معيطش ليا حيدت تصاوري مع المنتخب كاملين من أنستغرام.

وهادا ماشي تصرف ديال دراري صغار؟
لا ماشي ديال دراري صغار. أنا لي مابغانيش مانبغيهش. مالهم دوك التصاور آش هيزيدوني كاع..

برد أخاي زياش حنا غي كنهضرو.. ولكن راه تصاور مع المنتخب خاصك تكون كتفتاخر بيهم ماشي غي مايعيطوش ليك تنوض تحيدهم ولا شنو؟
اه كتفتاخر بيهم ولكن باش هو يجي ويلوحني بين ليلة ونهار هادي ماشي رجولة. كان على الأقل يهضر معايا. أنا المغرب فوق راسي ولكن عاوتاني ماشي حتا يقرب كأس إفريقيا ويسمحوا فيا.

وبالنسبة لداك أنستغرام ديالك لي كل مرة خارج داير فيه شي كارثة كتجبد ليك صداع، ماناويش تقلل من سطوريات شوية؟
دابا انشرح ليك. أنا كنخدم بالتليفون بزاف، وماعندي ما يدار، وراك عارف تأثير “الكالة” كنطلع وكنصدق داير شي موصيبة. ومع الناس حتا هوما كيزيدو يبيعوني لعجل، فكنتحمس ومن بعد كانحس بالدقة حتا كيفوت الفوت.

آش هانقولك أخاي زياش. ديها فالكورة ديالك وماتبقاش تحمس خصوصا فمواضيع مكاتفهمش فيها. ويكون خير وتلحق كأس إفريقيا.
شكرا ليكم وصافي.. أنا هانحاول نديها فالكورة ديالي حينث باغي نربح شي لقب مع المنتخب. والمسامحة راني مغربي وكنبقا نتصنطح فكاع المواضيع. آش هاديرو بلية فينا كاملين كي ليكابرين فالمغرب كي لي كابرين فأوروبا.