لجنة جديدة في برنامج اكتشاف مواهب الراب

برنامج اكتشاف المواهب ديال الراب “جام شو”، اللي داز فدوزيم، بدا التصوير ديال الموسم الثاني ديالو. والجديد اللي كاين أن اللجنة ديال التحكيم مابقاش فيها ديزي دروس والغراندي طوطو، اللي تبدلو وجاو بلاصتهم وحدين اخرين حتى هوما نجوم فالراب.

موسم احسن

الروابة اللي غادي يلتحقو بالموسم الثاني من “جام شو”، هوما دون بيغ وشوبي، وهاد اللجنة كأسماء مزيانة بزاف. وزيد عليهم المورفين اللي غادي يكون ضيف على اللجنة فشي حلقات. حينت كا نهضرو على روابا اللي مايمكنش نقولو عليهم شي حاجة من غير يستاهلوا يكونو فلجنة تحكيم برنامج بحال هادا كا يكتاشف المواهب الصاعدة فالراب.
والحاجة اللي زوينة فهاد اللجنة، من غير أن الروابة اللي فيها فاهمين ثقافة الهيب هوب والتقنيات ديال الراب مزيان، هي التوازن اللي كاين، حيث كل واحد فيهم مجهد فحاجة، فحال المورفين مثلا واللي كيتعتابر من أحسن إيلا مكانش أحسن واحد كيكتب فالمغرب، وشوبي فلفلو والميلودي، والدون بيغ اللي عندو خبرة كبيرة فالدومين وعندو من كل حاجة شوية.
فهاد الموسم ديال “جام شو” كيبان أنه غادي يكون حسن من العام الفايت واحتمال كبير يعطيونا رابور اللي يقدر يدير بلاصتو فالدومين ومايتنساش مور مايسالي البرنامج.