الكوميدي يسار كا يوجد فيلم للعيد، وهوا فيلم “سينمائي” سميتو “مايفراند”. تال هنا الخبر عادي وما يحتاجش للتعليق عليه. غير هوا فلافيش ديال هاد الفيلم الجديد كاتبين أنه عائلي مليار فالمية وحلال وبقا ليهم غي يزيدو أنه التيكي اللي ها تقطع باش تفرج فيه، غادي يدخلك للجنة، باش الناس يجيو يتفرجو.

النصب على العقول الضعيفة 

بكل بساطة هادا اللي دار فيها “كريياتيف” وفكر ليهم فهاد الطريقة باش يديرو الدعاية للفيلم خاصهم يمنعوه من التفكير حينث هادشي سميتو السعاية ماشي الدعاية. وتقدر تزيد عليها حتى النصب على العقول الضعيفة اللي على قدها، واللي طبعا موجودين غير هوما، وأسهل حاجة تقدر تجيبهم بيها هي يبقا عليهم مصطلحات فحال السينما النظيفة وحلال وداكشي اللي كيبين من اللول أنك إيلا دخلتي هاتفرج ففيلم مكتوب بالنكت ديال فيسبوك،
حينث الفن عموما، والسينما خصوصا، عمرو كان فيها لحلال ولحرام والنظيف والموسخ. فيها يا كاتعرف تدير فيلم سينمائي مقاد، يا تجلس فداركم.

تخليطة أفلام السبكي

وباش نكونو واضحين، فيلم فحال “مايفراند” غادي يدخل فلوس بلا مايحتاج فحال هاد التهركين فالدعاية حينث ببساطة الكاست اللي فيه الناس كيبغيو يتفرجوا فيهم، وهاد التخليطة ديال أفلام محمد السبكي كتخدم مزيان عندنا وطبعا مع الفارق أنه المنتج المصري المشهور كيجبد فلوس من جيبو ومكايديرش دوك الكوارث بفلوس الدعم حينث عايش فبلاد الصناعة السينمائية والثقافية.
فصراحة هاد الذنب الفني مفهمتش كيفاش مخرج فحال رؤوف الصباحي قبل أنه يكون فلافيش ديال لفيلم ديالو، حينث هادي ماديالوش وما جاياش معاه. فنتمنى أنها تكون غي زهقات حينث كيتعتابر من المخرجين الشباب اللي قادرين يديرو أفلام زوينة ويدخلو يشوفوها الناس، بلا مايحتاج يدخل فهاد البدعة ديال فيلم حلال وفيلم حرام.