في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

دنيا بوطازوت مرحبا بيك.

شكرا ليكم ونتمنى نكون خفيفة عليكم وعلى الناس.

هو صراحة هادشي اللي بغينا حتا حنا، حينث الناس بكثرة ما شافوك فالتلفازة هاد لعام كنضن راك تقلتي عليهم. شنو بان لك؟

شوف آخويي هادشي ديال حشيان الهضرة من الدخلة راه مايصلاحش معايا، وأنا ممثلة ندير مسلسل وجوج وحتا عشرة. اللي كيتسالني شي حاجة يجي يديها. مالكم ما كا تبغيوش الخير لعباد الله.

هو بهاد المنطق راه الشعب اللي كيخلص التلفازة كامل كيتألم، ولكن ماندخلوش فهاد “تهيطيك” واخا عارفو كيعجبك، السؤال هو مكايبانش ليك أنه تمثلي هاد المسلسلات كاملين فدقة وحدة حاجة اللي مستحيلة؟

لا.. عادي. وكون كانو حتا 8 ديال الأدوار نديرهم. أنا تعدبت وقريت التمثيل باش نعيش بيه، فما يمكنش نجلس فالدار باش نتوما تبقاو على خاطركم. واللي ما عجبتوش يطفي التلفازة.

حتى واحد ما قالك تجلسي فالدار، ولكن عاوتاني ماشي تكوني فكاع المسلسلات والإشهارات، وكي قالوا بقا ليك غي الأذان. ما بانش ليك هادشي بزاف؟

هادي ديال الأذان بعدا.. كيفاش قالوا، راه انت اللي قلتيها وعطيتك علاش كدور وحتا دابا بان لييا مزال كتقلب علييا، سمع أخويي أنا ممثلة وعارفة راسي نقدر نمثل حتا 8 ديال الأدوار فدقة وكنصرعهم والناس عاجباهم. انت آش ضرك؟!

أنا ما ضرني والو، ولكن ديك كتصرعي الأدوار راه غي كيبان ليك حينث انتي عروبية هي انتي موظفة هي انتي لاباس عليك هيا نتي شيخة.. هي انتي اللي جالسة معايا دابا. مكاينش فرق. فين هو تقمص الشخصية اللي قراوك؟

هادشي كتشوفو غي انت ودوك اللي باغين يبانو عميقين، لمغاربة عاجبهم هادشي اللي كندير وكيشجعوني وماكرهوش يشوفوني كثر، ونقولها ونعاودها أنا واعرة وشخصية ديال رقية فالدم المشروك تعطيك لخبار.

ميريل ستريب ديال حد ولاد فرج تكايسي علينا. مكايبانش ليك بلي الشخصية غمقات على الناس غي حينث دايرة عين ميكة، وماكياج اللي أصلا كل حلقة فشكل. أما نتي راه ملي بدا المسلسل وانتي غي كتغوتي وتعوقي، وحتى النقاد كا يوصفوا التمثيل ديالك بالهركاوي؟

واش هادوك نقاد، وهاد هركاوي راه ولاو شادينها علييا بسبب داك اللي داير فيها راسو غي هو اللي كيفهم فهاد لبلاد، ونسا أنه أنا اللي خليتو نجم، حتا هو تحل ليه الفم. ولكن بلاتي دابا نبالي بيه وبيهم.

من نيتك، دابا كيبان ليك أنه انتي رجعتي حسن الفد نجم؟!

طبعا أنا. والدليل هو مور الشعيبية ماقدر يدير حتا حاجة أخرى. وانا خمسة وخمس فعينين العديان كل عام كنمثل وخدامة والأعمال ديالي دايرة بم.

بعدا عاجباني بالثقة فالنفس. والفد كنضن مايحتاجش ندافع عليه لا أنا لا غيري، ولكن اختي دنيا كنضن خاصك تراجعي راسك.

إيلا راجعت راسي را نطحك. لقيتيني نيت كنفكر نديرها واللي بغا يوقع يوقع. راك معارفنيش شنو كنسوى وشنو نقدر ندير. واسيييير قبل مانترمضن عليك.

كيبان لييا النطحة ديال خولة مزال مأثرة عليك، عرفتي شنو هاديري نساليو هاد الحوار هنا حينث تخلعت وضراتني ودني بلغوات.