كاينين أحسن 3 ديال الممثلين اللي هاد العام دارو أدوار فمسلسلات رمضان، أكدو بيها أنهم فعلا عندهم موهبة وخاص تعطاوهم فرص كثر وكبر. ونبداو بمحمد الخياري والدور ديال البشير ف”الدم المشروك”، اللي كنضن كان هو المفاجأة ديال هاد لعام. الدور اللي بيه بين الخياري بلي عندو قدرات تمثيلية كبيرة وقادر أنه بالشوفات أو النبرة ديال الصوت اللي كتبدل بحسب الموقف اللي محطوط فيه، يكره الناس فلبشير ويوصل لينا أنه شخصية شريرة وشبعانة عقد نفسية بلا ما يحتاج يجعوق أو يخرج فعينيه فحال الزومبي.

أيوب أبو النصر.. ميلود الفراقشي ف”الدم المشروك”

والثاني واللي عام على عام كيأكد أنه مشروع ممثل كبير وخاص يتعطاوه فرص كثر وكبر، هو أيوب أبو النصر والدور ديال ميلود لفراقشي ف”الدم المشروك” تاني. شخصية اللي أيوب فهمها مزيان لدرجة دار فيها مابغا وكيقدر يكرهك فيها فالوقت اللي خاصك تكرهها وتعاطف معاها فلوقت اللي خاصك تعاطف معاها. وفكل مرة أيوب كيتعطاه دور كيفما كان فحال النصاب ف”مروكية حارة”، ولا المبلي ف”مايفراند”، ولافراقشي ف”الدم المشروك”، كيعطيه حقو وكيقدر يقنعك بلا ما يبان داير مجهود. وهادي هي النتيجة ملي كتكون عندك موهبة وكتكملها بالقراية.

كريمة غيث.. تورية الماتيرياليست ف”رحمة”

وأخيرا كريمة غيث والدور ديال تورية فمسلسل “رحمة”. واللي فلحلقات اللولين بان الأداء ديالها أوفر وأنها غادي تخشي لبيرسوناج فالحيط. ولكن مع الحلقات بان أنها كانت عارفة شنو كاتدير وأنه الشخصية فعلا خاصها تكون هاكاك بحكم الخلفية والبيئة اللي كابرة فيها. فمنطقي تصرف هاكاك وقدرات أنها تستافز الناس وتقنعهم لدرجة ولاو كيديروا بيها مثال فوسائل التواصل الاجتماعي للمرا الماتيرياليست اللي باش توصل لداكشي اللي باغيا تقدر تريب عائلة على قدها وتزوج براجل مزوج.