قررات شركة “وارنر ميوزيك” العالمية أنها تدخل للمغرب وتوقع مع ثلاثة ديال الفنانين كبار فموسيقى الراب، وهوما “ديزي دروس” “كوزان” و”سنور”. وإهتمام شركة عالمية بقيمة “وارنر” بالتوقيع مع فنانين مغاربة حتا هي بالتأكيد كا تعتابر إضافة وخطوة مهمة اللي تقدر تزيد بالفن المغربي عموما وموسيقى الراب خصوصا للقدام. والفنانين اللي جابو “وارنر”، الاختيار ديالهم مكانش عشوائي. ولكن الشركة عارفة شنو باغا من كل واحد فيهم، حينث واخا كيتعتابرو كاملين كيديرو موسيقى الراب، ولكن مختالفين على بعضياتهم بشكل كبير، وخصوصا كل واحد والجمهور اللي كيسمع ليه.

سنور.. جمهور فشمال إفريقيا كاملة

نبداو ب”سنور” معروف كثر بالراب “ميلوديك” واللي كيكون غالب عليه طابع غنائي كثر من ل”فلو” وحتا الكلمات كتكون بسيطة وساهلة ومافيهاش “تخسار الهضرة” وبعض المرات كتكون أقرب للراي أو “إر أند بي” على “الراب” وهادشي اللي مخلي الموسيقى ديال”سنور” عندها جمهور من فئات عمرية مختالفة ومنتاشرة فشمال إفريقيا كاملة.

كوزان.. انتشار بين المراهقين

أما “كوزان” خصوصا مؤخرا بدا كيركز أكثر فال”أفرو راب” وحتا “إر أند بي” وقادر يدير حتا ل”بوب” والموسيقى ديالو عندها انتشار كبير فالمغرب خصوصا بين المراهقين. والأهم والنقطة اللي كنضن غادي تستاغلها “وارنر” أنه “كوزان” الموسيقى ديالو إيلا تسوقات مزيان فقادرة أنها تلقى نجاح فدول العالم كامل.

دروس.. أغلى عقد فتاريخ الراب المغربي

وآخر واحد، مول أكبر عقد حاليا فالمغرب، “ديزي دروس” واللي كيتعتابر من أكبر الأسماء اللي دازو ومزال كاينين فالراب المغربي، وهو أكثر واحد فهاد الفنانين شركة “وارنر” متأكدة أنه الثمن اللي عطاوه غادي يرجعوه بالرباح فلألبوم اللول ديالوا “أفلام” اللي الجمهور خصوصا ديال الراب مغربي كيتسناه من 2013 ليومنا هادا، زائد أنه “دروس” عندو جمهور ديالو فالمغرب وخارج المغرب اللي متبعوا من يامات “عزي عندو ستيلو” وأي حاجة كيديرها سواء موسيقى، ملابس، سهرة، كيستهلكوها. وهادشي علاش كان قادر هاد السنين كاملة أنه يخدم ويدخل فلوس من الموسيقى ديالوا بلا “لابيل”. فحاجة متوقعة أنه إيلا هايوافق على شي عرض فأكيد غادي يكون هو أغلى عقد فتاريخ الراب المغربي.

صناعة موسيقية حقيقية

فمزيان يدخلوا شركات عالمية فحال “وارنر” “سوني” “يونيفرسال” ويوقعوا مع فنانين مغاربة حينث بالخبرة والمكانة اللي عندهم فأكيد أنهم غادي يكونو عنصر مهم فأنه تكون عندنا صناعة موسيقية حقيقية.