من بعد غياب طويل على الموسيقى، رجع “الرابور” نبيل النميري، المعروف ب”الناصر”، بألبوم قصير سماه” البرزخ”. واختار “الناصر” أن الرجعة ديالو ماتكونش مجرد عدد من الأغاني فالمنصات الرقمية، ولكن زاد حتا طابع سينمائي ملي خرج “البرزخ” كفيلم قصير فمنصة يوتوب.
الموسيقى للتعبير على الأفكار
ف”البرزخ”، هضر “الناصر” على الحياة والحيرة زائد الحالة النفسية اللي داز منها فالفترة اللي مابقاش كيدير فيها “الراب“، وصولا لقرار العودة والإدراك ديالوا بأن الموسيقى هي الطريقة اللي كيقدر يعبر بيها على راسو وعلى الأفكار ديالو.
وأكد “الناصر”، فاتصال مع “آش نيوز“، باللي “البرزخ” هو إعلان رسمي على العودة ديالو للموسيقى، وأن الألبوم، ملي كان خدام عليه وعلى الكلمات ديالو كان الهدف أنه يخرج على شكل فيلم قصير، وهادشي علاش كل “طراك” مكتوب باش يكمل الأحداث ديال “الطراك” اللي قبل منو، باش فاللخر يعطيونا قصة وحدة.
ألبوم جديد قريب
والاختيار ديال أنه يكون مصور على شكل فيلم قصير، قال “الناصر” باللي جا بسبب الارتباط والحب ديالو للسينما وكل ماعندو علاقة بالسمعي البصري، زائد أنه بهاد الطريقة الجمهور يقدر يفهم الرسالة كاملة اللي بغا يوصل من الألبوم.
وأكد “الناصر” للموقع ديالنا، أنه حاليا خدام على ألبوم جديد، مزال ما حددش التاريخ اللي غادي يخرج فيه بالضبط ولكن غادي يكون واجد قريب.
