حجم الخط
+
-
2 دقائق للقراءة
في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.
السي طلال مرحبا بيك، راك دافع الصدر هاد ليام. علاش عاجبك لحال؟
شكرا أخي وسمح ليا نصلح ليك الصفة ديالي. أنا ماشي السي، ولكن خبير ودكتور فالاقتصاد.
واخا آسي الخبير الدكتور، ولكن بحسب الناس اللي فاهمين الاقتصاد بلي المناظرة اللي درتي مع الأستاذ أحمد عصيد راك ما قلتي فيها والو؟
هادوك أولا مكيفهموش الاقتصاد. وثانيا جاتهم صدمة حينث بهدلت ليهم واحد من ديالهم واللي كيعتابروه هو الرمز ديال الثقافة والحرية. فعادي ملي غادي يلقاوه فديك الوضعية غادي يخرجوا يدافعو. ولكن أنا ليهم بالمرصاد.
هو فعلا عصيد إنسان مثقف، وحتى فالمناظرة ما قلل منك لا وسطها لا من بعدها كي درتي نتا، وعادي جدا أنك تكون فاهم الموضوع كثر منو حينث ببساطة هو أستاذ فالفلسفة، ولكن السؤال هو علاش مجاوبتيش الناس اللي فاهمين فالاقتصاد وبينوا بالدليل أنك غي كتخربق؟
مجاوبتش حينث مامساليش ليهم حاليا عندي مايدار ومغاديش نبقا جالس أي واحد خرج قال جوج كلمات ندير معاه مناظرة.
ولكن راه كيهضرو على الاقتصاد الإسلامي اللي نتا كا تدافع عليه وكيبينوا أنه ماصالحش، زائد أنه الأبناك راه العاديين فحالهم فحال الإسلاميين، غير وحدين كيسميو كل حاجة بسميتها ولخرين كيديرو طلاميس. شنو جوابك على هادشي؟
لا، هاد الهضرة مكايناش. وهادو اللي كيقولوها غي علمانيين اللي كتخلعهم أي حاجة إسلامية. ولكن الناس فاهمين، واللي مزال مفهمش حنا هنا باش نشرحوا ليه الفرق في سبيل الله.
فسبيل الله.. ومع طلع ليك التفاعل درتي مشروع اللي بغا يهضر معاك 30 دقيقة خاصوا يحط 1800 درهم؟
وا العمل حتا هو عبادة، وانا كانخسر من وقتي وحياتي باش نفيدهم. فالمقابل خاصني تعويض على الوقت والمعلومات المهمة الحصرية اللي غادي نعطيهم.
آ السي لحلو راه العلماء ديال النووي ومكيخدموش ب180 دولار لنص ساعة. واش ما بانش ليك هادشي بزاف؟
أنا داكشي اللي كنعطي أهم من النووي. والثمن اللي داير رمزي وممكن مع الوقت ندير كثر كاع. واللي بغا المعرفة يخوي الجيب.
المهم اللي هايجي عندك حتا هو يستاهل نيت، خلينا من هادشي وقولييا علاش فاش خرجتي كدافع على زواج الصغيرة الناس اللي خرجو نتاقدوك مشيتي كتسينيالي الفيديوات بلاصة ماتعطيهم الحجة؟
حينث ببساطة هداك الموضوع اللي قال العكس أولا مكايفهمش، وثانيا كيشكك فالدين، بمعنى كافر. إذن الحل هو السينيال وماشي النقاش.
دابا انت بالنسبة ليك اللي ماشي “بيدوفيل” كافر؟
هادو مصطلحات خرجهم الغرب الكافر باش يحاربو الإسلام. وهادشي علاش كتلقاهم ضد التعدد وزواج الصغيرة اللي هوما أصلا فمصلحة البنت قبل الراجل، وحينث هادو باغين يحرمو الرجل من الحق اللي عطاه ليه خالق الكون كنشوفو اليوم الاغتصاب، لعيالات جالسين بلا زواج وزيد وزيد.
آش كتقول؟ بنت عندها 6 سنين فمصلاحتها تزوج. واش انت بعقلك؟
طبعا بعقلي حينث ملي كتزوج صغيرة كتكبر عندها مسؤولية، وعندها الجهد تربي ولادها وترد لبال لراجلها اللي غادي تشوف فيه الأب والزوج والصاحب ديالها، وما تقدرش تقوليه لا ولا تهز فيه الراس كي كنقولو بالدارجة كيربيها على يدو.
هو اللي خاصو يتربى صراحة هو انت واللي مطلعينك فالعمارية ودوك اللي عطاوك الدكتوراه كون عرفوك كتفكر هاكا كون را ضربوك بشي 105 سنين ديال لحبس وهناونا منك.
ياك .. الحق عليا اللي داير معاك حوار فابور.. فين الكونت ديالك نسينياليك.
