“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

الشيخ الفيزازي مرحبا بيك. كيفاش دزتي فمناظرة بلفلوس، واعتبرتي باللي الأجر ديالك بمثابة جزية. واش ممكن تشرح لينا؟
دزت مع كفرة بالله. وبحكم الدين، راه فلوسهم ونسائهم وأي حاجة عندهم حلال ناخدها بالنسبة ليا. ومن فوق هادشي هادوك راه كيدخلو بزاف ديال لفلوس من عند الصهاينة والماسونيين، فخاصني ناخد حقي منها. سميها جزية أو غنيمة أو حتا صدقة كاع. المهم نتخلص.

واش نقدرو نسولوك فهاد الحوار فاش مابغينا وكيما بغينا، واخا دايز فابور؟
طبعا، نهضر معاك فاش ما بغيتي. خود راحتك. واخا نتوما بنو علمان تانتوما خاص ينطبق عليكم نفس الشروط ديال الحوارات مع الكفرة بالله. ولكن بنتو ليا محفحفين ويالاه باديين ما زال ما ربيتوش الريش. قلت نتضامن معاكم.

الله يجازيك بخير. نبداو بالخطاب الديني ديالك آسي الفيزازي لي هو خطاب تكفيري وتحريضي وكان من الأسباب اللي خلات شباب ما فاهم والو يدير عمليات إرهابية ف16 ماي. واش منادمش على هاد القضية؟
طبعا لا. حينث أولا أنا عمرني كنت إرهابي، وهادوك الشهداء.. “يخ” أعوذ بالله، زلقات لييا هاد كلمة الشهداء، حيدها الله يجازيك بخير حيدها..  هادوك فهمو كلامي غلط ودارو دوك العمليات الإرهابية الهمجية. وانا ماشي مسؤول على قلة الفهامة ديالهم.

السي الفيزازي، الله يهديك. آش فهموا كلامك غلط. الخطابات والمناظرات ديالك فديك الوقت، كاينين لدابا. كنتي كتكفر كولشي. وداكشي علاش تحكم عليك ب30 سنة ديال الحبس. واش زعما القضاء ظلمك؟
واش جابنا لهاد الهضرة الله يهديك. متحكرش فهاد الموضوع. ما نقدرش نقول ظلم ولكن تفهمت غلط حينث كنت كنحث ونشجع على الجهاد في سبيل الله ضد الكفرة والشيوعيين فأفغانستان والشيشان والبوسنة والدول الأخرى. ماشي المغرب. عمرني هضرت عليه.

دابا تحريض المغاربة على أنهم يمشيو يفركعو راسهم فدول أخرى ويضيعوا حياتهم باطل، بالنسبة ليك انت هادي ماشي جريمة لي تستاهل تدخل عليها للحبس؟
وا صافي.. هادشي داز. وكي كيقول المثل لي فات مات.

واهو اللي مات هوما شباب مساكن عطيتيهم تيكي ديال الجنة، وانت جالس كتفطح مع راسك وعاطيها للزواج، هادي كبيرة هادي صغيرة. ومن لفوق مزوج بنت بلا ورقة بلا جوج وخارج كتحلل. واش من نيتك؟
طبعا من نيتي. وهذا شرع الله نتزوج 4 ونزيد حتا ملك اليمين. هادشي حلال، كيفما حلال أنه نتزوج غي بالفاتحة ويكونو جوج شهود. أما العمر فراه لي عندو مشكل فهادشي راه كافر وكيشكك فكلام الله.

يعني السي الفيزازي ما بانش ليك باللي هادشي كا يبين أنك “بيدوفيل”؟
سميني كيفما بغيتي، غي تحمل المسؤولية ديال هاد الهضرة حينث بنسبة ليا أنا مكنديرش شي حاجة حرام. وزواج ببنت العمر ديالها يكون كيفما بغا يكون فهو حلال وهادشي دارو أشرف الخلق قبل مني والصحابة والتابعين، هتجيو نتوما دابا وتطلبو منا نتبعو قوانين لي دارها بشر ونسمحوا فقوانين لي قالها لينا خالق الكون، واش انت مسطي ولا هبيل؟

آودي كلام الله كتهزو منو اللي بغيتو وتخليو اللي بغيتو. السي الفيزازي، أنا المشكل اللي عندي صراحة معاك هو أنك قلتي باللي درتي مراجعة لبزاف ديال الأفكار ديالك فالحبس، وصراحة ملي خرجتي بنتي ليا ما راجعتي والو عكس عدد من الشيوخ لي بانت عليهم المراجعة الفكرية لي منهم الأستاذ عبد الوهاب رفيقي مثلا. آش بان ليك؟
رفيقي تقول عليه أستاذ وانا من الصباح كتحشي ليا لهضرة بديك السي الناقصة ديالك… هداك يا سيدي مشا قرا شي كتوبة ماكانش خاصو يقراهم. واش كاين شي حمق يمشي يقرا للمعتزلة والصوفية وشي فرق اخرى من غير ديالنا، أنا راجعت الأفكار ديالي، ولكن باش نوصل لهادشي ديال رفيقي راه هادشي مابقاتش غي مراجعة، والسيد خارج باغي الإرث يتقاد وحتا هو كيقوليك المساواة وشي هضرة ديال بني علمان.

حتا هو رجعتيه بني علمان، واش ماشي الدور ديال الباحث أو الشيخ أنه يجتاهد باش يعطي قوانين اللي مواكبة للعصر والمجتمع، وانت بغيتينا نبقاو عايشين بنفس القوانين لي كانت هادي 1400 سنة؟
الاجتهاد خاصو يكون ولكن فشرع الله لا ثم لا. وديك القوانين ديال 1400 سنة صالحة لأي زمان ومكان ولي قال العكس ديال هادشي يعتبر كافر.

آودي انتا غي لي قاليك صباح الخير تقول عليه كافر، شكرا ليك السي الفيزازي. واجي ماتخلصش شي قهوة من دوك لفلوس لي خديتي من عند صحابنا؟
لا أبدا. مكنشربش لقهاوي مع العلمانيين والكفرة. أنا كنتقهوى مع خوتي وخواتاتي المسلمات فقط. وعزيز علي خودنجال من هادشي كامل.

محمد الفيزازي: شيخ وداعية