سعيد الناصري ولى فعلا منوضها فالويب المغربي بفيلم “نايضة”، واللي وصل عدد المشاهدات ديالو فيوتوب لأكثر من 10 ديال المليون مشاهدة. القصة ديال الفيلم بخلاصة، مواطن مغربي ساكن ف”لبرارك” الأم ديالو غادي تحتاج دير عملية بثمن طالع وهايمشي لعند رئيس الحكومة لي كان ولد حومتو حينث كان هو والناس ديال الحومة سبب باش أنه نجح فالانتخابات، ولكن هايلقى راسو فلخر مختاطف الحكومة كاملة عن غير قصد.

عادل إمام

القصة ديال الفيلم أي واحد فايت شاعل غي تلفازة بلا مايحتاج يمشي لسينما غادي يبان ليه أنها “كوبي، كولي” ونسخة ممسوخة من الفيلم ديال عادل إمام “الإرهاب والكباب”، ولي حاول الناصري يقلدو حتا فالطريقة ديال تقمص الشخصية بالحركات ديال الوجه وتطباع لحجبان لي الوحيد لي يقدر يضحكك بيها ومايبانش عبيط هو الزعيم.

الفيلم طبعا عجب فئة كبيرة من المغاربة اللي آخر حاجة يفكرو يديروها بالفلوس هي يقطعوا “تيكي” ويدخلو للسينما، واللي بنسبة ليهم دوك الجمل اللي كان كيقول الناصري، كيعبرو على الواقع المغربي. وبسباب هادشي كايحاربوه، ولكن حتا واحد من هادو ما سول راسو شكون كيحارب الناصري؟ وأصلا واش هادشي لي كيدير يستاهل يتحارب؟

والجواب هو طبعا لا. حينث هادشي ممكن يتحارب كون كان الفيلم كا يعالج موضوع حساس أو ببساطة فيه حس السينما، بداية من الإخراج لي طبعا دارو ولد الشعب الناصري، بكادرات لي أي دري يوتوبر كيدير أفلام قصيرة يقدر يحط حسن منهم بسنوات ضوئية، لممثلين لي بينهم وبين التمثيل غي لخير والإحسان وزايدينها بأنه السيناريو هو اللخر حتا واحد ماحافظو. هادشي فحالة كان سيناريو واخا مكنضنش. وهادشي بان فتمتم وجيب آ فم وقول.

الفيلم الجديد

أما الهضرة اللي قال الناصري والصورة لي حط بيها الحكومة والحوارات بينو وبين الوزراء لي قاصو للناس المشاعر ديالهم، وهوما حوارات سطحيين بكل ما كتحمل الكلمة من معنى، والغرض الوحيد منهم يبان سي الناصري أنه فعلا كيعبر على الطبقة لمقصحة فهاد لبلاد وأنه هادشي علاش كيحاربوه لا أقل ولا أكثر وفعلا وصل فهادشي.
ولكن المفاجأة ولي كولشي دار عليها عين ميكة هي أنه الناصري فنفس الفيلم داير إشهار لفيلم آخر ديالو لي غادي يكون فالسينمات المغربية الشهر الجاي. فكيفاش كتحارب ومخليين ليك الفيلم جاي يدوز فالسينما؟ زائد التلفازة لي حارمينو منها وحارمين الجمهور من الأعمال ديالو الهادفة كي كيقول، وهنا السؤال فين هوما هاد الأعمال الهادفة؟ واش “الربيب” و”أنا وخويا ومراتو” وزيد وزيد أعمال هادفة؟

مخرج “بانضي”

ببساطة الناصري فاهم العقلية ديال لمغاربة مزيان وعارف كيفاش يعطيهم شنو بغاو ويحرك ليهم العاطفة بنظرية المؤامرة. وهادشي خدام ليه مزيان، فالله يسهل عليه ويستحق نعطيوه لقب المخرج “البانضي” رقم واحد فالممكلة. ولكن راه السينما حاشا واش تكون هي هادي، وفلخر نبغي نساليها بسطر ديال الشاعر المورفين لي كيلخص هادشي كامل “ملي كنشوف سعيد الناصري داير succès على فوزي بن سعيدي، ملي كنشوف l’intellectuel المغربي شحال من sujet كيحاول يسكيفي، كنلوم الوقت لي دارت المغرب بلادي.. أول غلطة فحياتي مادرتهاش بيدي”.