اعتبر الشيخ الغليمي، الناشط على منصات التواصل الاجتماعي واليوتوبر المعروف، بلي الشيوخ من الواجب عليهم يناظرو الناس اللي عندهم أفكارا مخالفة ليهم، ويقنعوهم باش يعتقو الناس من جهنم ويرجعوهم لطريق الله.

الجهاد وزواج الصغيرة أفكار لا إنسانية

وقال الشيخ الغليمي، فحوار مع قناة “آش نيوز” على يوتوب، بللي السبب اللي خلاه يبعد على الدين من بعد ما كان متشبث بيه لسنوات طويلة من حياتو، هو بزاف ديال الأفكار اللي كاينة فالدين الإسلامي فحال الجهاد، زواج الصغيرة، قتل المرتد، وزواج المتعة، اللي بانت ليه لا إنسانية ولا يمكن أنه تكون جاية من عند خالق الكون.

أفكار شيوخ الدين خطر على المجتمع وعلى البشرية

وأضاف الغليمي، فالحوار ديالو مع برنامج “أغراس“، أن الهدف ديالو من نقد الدين ومناظرة الشيوخ والدعاة السلفيين، هو يبين لناس أنهم أشخاص متعصبين والأفكار اللي كا يدافعوا عليها كتشكل خطر على المجتمع والبشرية كاملة، زائد أنهم ناس اللي كيستاغلو الجهل ديال العامة باش يضبرو على الصرف ويعيشوا حياة البذخ واخا يكون المقابل أنهم يحرضو ويشجعو عباد الله باش يمشيو يجاهدو ويموتو. وقال “كون كانو مقتانعين بالجهاد في سبيل الله، كون مشاو هوما اللولين واخا غير باش ينكحو الحوريات فالجنة”.

باب للإصلاح الديني

وفنفس الوقت، قال الغليمي بلي هاد الانتقاد للدين الاسلامي والأفكار اللي كان كيآمن بيها فالماضي كتعاونو باش يطور من راسو ومن الأفكار الحالية اللي عندو، زائد أنه هو وعدد من الأشخاص اللي كيديرو نقد قاصح للدين، ملي كيبينو للمجتمع أنه الشيوخ السلفيين عندهم أفكار متطرفة وماشي فمصلحة المجتمع، فكيحلو لباب المفكرين والباحثين اللي باغين يديرو الإصلاح الديني باش يقدرو يطيحوا أفكار كتناسب المجتمع المغربي والوقت اللي عايشين فيه.

بزاف ديال الأفكار الجريئة والصادمة والمستفزة عبر عليها الشيخ الغليمي فهاد الحوار اللي غادي تلقاو التفاصيل ديالو فهاد الفيديو: