وزارة التربية الوطنية والتعليم الأولي كيوجدو باش يديرو الأساتذة ديال التربية البدنية دورة تكوينية ف”البريك دانس” و”لادونس هيب هوب” باش يبداو يقريوه لدراري. خطوة اللي تعتبر مزيانة وبلعكس مطلوبة. غي هو بطبيعة الحال بزاف خرجو كيهضرو غي باش يهضرو. والمشكل الأكبر أنهم مفاهمين لاشنو هي ثقافة لهيب هوب لا لبريك دانس وخدامين غي جيب افم وقول بهضرة اللي كان كيصحابلينا تقادات وسالات فالثمانينات. ولكن مافيها باس، آجي نجبدو سبورة ونهضرو على الموضوع بالخشيبات.
ونبداو بأول حاجة قالها واحد كيعتابر راسو فاعل تربوي ومغاديش نخليوها دوز هاكاك. قال باللي رياضة الهيب هوب تقابل بكثير من التحفظ عند لمغاربة بسبب الحركات اللي لاتمت للرجولة بصلة. وهنا كيبان أنه السي الفاعل التربوي معطاش لراسو حتا جوج دقايق يمشي يتفرج فلادونس هيب هوب حاجة اللي كون شافها كان هيئات ليه أنه شطيح ديال الشعبي تقدر تنطابق عليه الجملة اللي قال كثر من الهيب هوب، زائد هادوك الحركات اللي بانو ليك ماشي رجوليين كون تفهم المعنى ديال كل “موف” فيها شنو باغين يوصلو بيها كنتي تحشم تحل فمك.
المغاربة تبناو الهيب هوب من الثمانينات
ثانيا، لمغاربة عندهم تحفظ على رياضة الهيب هوب نبغي نعرف شكون هاد لمغاربة اللي كتهضر عليهم حينث أكثر ثقافة تبناوها لمغاربة من ثمانينات لدابا هي لهيب هوب بكاع “لي إليمون ديالها” اللي الراب جزء منها، وهو أكثر نوع موسيقي كيسمعوه خصوصا الشباب، زائد لبريك دانس كرياضة للمعلومة راه كاين فالألعاب الأولمبية والمغرب عندو جامعة ملكية ديالها واللي من أكثر الجامعات فالرياضة خدامين وإيلا مفراسكش أنهم قدرو يكونو أول بلد إفريقي تأهل ليها، والدراري والبنات اللي كيلعبوها وكيجيوك شماكرية وسراولهم طايحين بحال هاد لهضرة اللي خلات دري فحال “ليل زو” يمشي يلعب بلجنسية ديال النمسا، را بلبوطونسيال اللي عندهم ايلا عطيتيهم الامكانيات غادي يقدرو يجيبو ليك ميداليات فلألعاب الأولمبية كثر من الرياضات لخرين اللي كيمشيو وكيرجعوا بديهم خاوية.
خطوة مزيانة للشباب
فباش نجيبوها من اللخر لادونس هيب هوب سبور. وديك لهضرة ديال كون دارو بلاصتها الأندلسي راها خاوية راه فحال إيلا كتقارنو كورة بلماط. فهاد الخطوة مزيانة لشباب اللي كيبغيو لادونس هيب هوب بلاصة مايبقاو يديرو ديسبونسي من سبور حينث ببساطة مغاديش يدخلو لمادة لبروف ديالها كيلوح لدراري كورة ويقول لبنات بقاو تجريو على المدرسة ساعتين ولا وزير نهار قتارح يدخل حاجة جديدة فالرياضة مشا جاب لكولف والهوكي.
