“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

السي بن سعيد مرحبا بيك..ومبروك لطلوع ديال الفرقة ديالك إتحاد يعقوب المنصور هاد العام. شنو كاتقول عليه؟
الله يبارك فيك. وهاد الطلوع جا بالمجهودات ديالنا. وهذا إنجاز لي كيتعتابر تاريخي ومزال العام جاي نطلعوا للقسم الأول.

واخا دابا انت عندك بزاف ديال المناصب، وزير الشباب والثقافة والتواصل، رئيس فريقة ديال الكورة، مول المركز السينمائي المغربي، مسؤوليتك فحزب البام.. وايلا جيت نحسب كولشي هنبقاو هنا. كيفاش كتقدر تسير هادشي كامل؟
وهو الجهد كاين. وهادشي بسبب العمر ديالي حينث راك عارف أنا ماشي واحد لي عندو 60 عام ميقدرش ينوض من لبيرو ديالو. وقادر مزال نشد قطاعات خرين غي معطاوهمش لييا وصافي. والدليل هوما الإنجازات لي كندير.

سي بن سعيد هو العمر ديالك صغير بصح ولكن را الإنجازات كتشوفهم غي انت. وباش منبقاوش غي هاضرين فلخوى آجي نشوفو كل حاجة شنو درتي فيها.. وهنبدا غي بآخر حاجة وهي المهرجان ديال تطوان كيفاش عطاك خاطرك تحيد مشاهد من الأفلام؟
بحال هاد القرارات كا تخليني نبان خدام. دابا كاينين أفلام فيهم مشاهد ورسائل لي ممناسباش لينا كمغاربة. فالدور ديالي هو ندير الرقابة باش نعطي لناس داكشي لي يصلاح ليهم ماشي غي لي صور شي حاجة نخليوها دوز، وهنا باش تعرف بلي كاين الجهد حينث واحد اخر بلاصتي مهيستوقش وهيخلي داكشي يدوز كيما هو..

كون غي كان واحد اخر على هاد لحساب.. ولكن واش مبانش ليك بلي بهاد الخطوة راك قمعتي حرية الإبداع والتعبير لي بالمناسبة الدستور المغربي كينص عليهم، زائد أنك عطيتي صورة خايبة على لبلاد على برا. وهادشي انت مكديرش ليه لحساب؟
حرية التعبير مزيانة ولكن عاوتاني ماشي على حساب الأخلاق والقيم لي تربينا وكبرنا بيها. حينث الحاجة إذا زادت عن حدها انقلبت ضدها.

سي بنسيعيد فراسك بلي هاد القضية لي درتي فالعهد ديال العدالة والتنمية وعمرها وقعات. المهم نمشي معاك فنفس الخط. كيفاش كتقطع مشاهد من أفلام حينث ( ضد القيم والأخلاق ديالنا) وفنفس الوقت كتدعم طوطو وموبيديك وعدد من الفنانين لي بهاد المنطق ديالك خاصك تجلسهم فديورهم. واش حرية التعبير حلال على شي وحرام على شي؟
لا متخلطش الأمور الله يخليك. هادوك كندعمهم حينث كيبغيوهم الناس وتخسار الهضرة أو أي حاجة أخرى كيديروها را خارجة من قلب المجتمع ديالنا. فهادشي عادي، زائد أنهم فينما كيطلعوا لشي مهرجان أو كيدوزو فشي حوار كيشكروني. وانا بيني وبينك لي كيكبر بيا نكبر بيه.

هي انت ماشي عزيز عليك لي يكبر بيك ولكن كاينة كلمة خرى مهنقولهاش احتراما للأسماء لي جبدت وصافي، ولكن ماشي حشومة كوزير الثقافة أنك مدعمش فنانين كبار فحال عبدو الشريف اللي منين سولوك عليه قلتي ليهم شكون هو؟
بلاتي باش نتفاهمو. راه قلت ليك أنا باقي شاب ما عنديش 60 عام. باش غا نعرف أنا عبدو الشريف ولا غيرو.. هاداك جيل قديم عليا…على العموم، الله يرحمو.. راني درت الواجب بعد الوفاة ديالو وما تسالني حلوف. وزير الثقافة راه ماشي خاصو يعرف كاع الفنانة ديال لبلاد.

واخا نساو الموسيقى. معرض الكتاب لي رجعتيه فالرباط وبسبب هاد التغيير تظاهرة كبيرة ولاو الأرقام ديال الزوار ديالها غادين وكينقصوا. فماشي من الأفضل أنه يرجع لدار البيضاء؟
علاش هيرجع لكازا، حتا فالرباط مزيان. الأرقام ديال الناس نقصات حينث عدد السكان ديال الدار البيضاء والنواحي ماشي هوما ديال الرباط والنواحي. هادي أول حاجة فعادي، وثاني حاجة كنعرف عدد من الناس فالرباط لي كيبغيو يمشيو لمعرض الكتاب ولكن مكيلقاوش الوقت فقلنا علاش لا نديروه ليهم حداهم. والرباط راه عاصمة دالبلاد وكلاس ونخوة.

مهنعلقش على هاد الجواب حسن، قولي واحد 200 سينما كنتي قلتي غادي يكونو واجدين فنهاية 2024 فين وصلو؟
أنا قلت هادشي فلول ولكن راه قررنا نقسموها. وهاد العام هتكون واجدة 50 قاعة على الأقل فمختلف المدن المغربية. وهذا إنجاز كبير. عتارف.

آش هنعتارف؟ را ماكرهتش.. ولكن 50 قاعة وملي كنشوفو لبلايص لي غادي تبداو بيهم كنشوفو تامسنا لي مافيهاش الناس بزاف وأصلا حدا الرباط لي فيه سينمات ومخلي مدينة فحال أكادير بلا سينما بغيت غي نفهم كيفاش درتو ليها؟
تامسنا سكنوا فيها بزاف ديال الناس من الرباط وهاد الناس موظفين ومولفين يخرجو فالويكاند ويتفرجو فأفلام. فكان ضروري نوفرو ليهم سينما ليهم ولوليداتهم بلا مايضطرو يجيو حتى للرباط ويضربو واحد 20 دقيقة ديال طريق وفنفس الوقت يحسو براسهم فمنطقة سكنية فيها كاع داكشي لي كانو مولفين ملي كانو فالرباط. وأكادير والمدن الاخرى انشالله الشطر ثاني هنشوفو كينديرو ليهم حتا هوما. كون هاني..

مكنتش باغي نعلق فالصراحة على هادشي لي كتقول ولكن مبقيتش قاد نصبر، سي بنسعيد انت وزير ديال المغرب كامل ماشي ديال الرباط ويعقوب المنصور باش اي حاجة غادي دار فلمغرب ديرها تما، لمهم شكرا ليك وسمح لينا جبناك تال كازا. كنضن يلاه ترجع لرباط هتكون توحشتيه؟
هو صراحة راه من قبيلة وانا باغي نرجع فحالي وحشمت نقولها ليك. شكرا ليكم على هاد الحوار. نعاودوها مرة أخرى، ولكن انتوما لي تجيو عندي هاد المرة واخا انت بنتي ليا من دوك الناس لي معندهمش مع الرباط.

محمد المهدي بنسعيد (وزير الثقافة)