“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

كائن افتراضي مرحبا بيك وسمح لينا نشدوك شوية على وسائل التواصل الاجتماعي. ما غا يوقع ليك والو ياك؟
مرحبا. ماشي مشكل، فالصباح كيكون التفاعل ناقص. أصلا كولشي مزال ناعس حينث عاطيينها غي لقصارة فموازين.

عارف بعدا بلي موازين ناس كتمشي وكتنشط مع راسها، وعلاش انت كتسوق الغلط وكتقول راه المنصات خاويين؟
حينث كلها والنشاط ديالو، وأنا النشاط ديالي هو نخسر أي حاجة فيها الفرحة أو الناس كيمشيو ليها يبدلو الجو. أما بخصوص نشر أخبار ما منها والو، راه ناس كيبغيو هادشي ديال العاطفة والمؤامرة. فباش نجيب شوية ديال التفاعل ونبان ولد الوقت كنحط ليهم داكشي لي بغاو.

وهاد القضية ديال نقاطعوا موازين، شنو الهدف منها وعلاش موازين بالضبط وماشي كاع المهرجانات مثلا؟
علاش موازين بالضبط حينث هو أكثر مهرجان مشهور، والبوسطات عليه كيطلعوا حتا عند العرب فبالتالي التفاعل كيكون كثر وانا أي حاجة فيها لايكات أنا معاها.

ومعارفش بلي هادوك لبوسطات لي هوما كذوب كيستغلوهم دول محاملينش لبلاد وكيديرو بيهم مبغاو؟
لا متخافش. من هاد الناحية هادوك حتا هوما كندخل عندهم نتساب معاهم ومكاين غي البوسطات عليهم راه خوك وطني واخا هكاك.

وطني ولبوسطات عليهم حتا هوما كيعجبو الناس داكشي علاش كتعاطى معاهم؟
لا. وطني، وفنفس الوقت كاينين لايكات ولحاجة لي هتجيبهم لييا بجوج راه أنا معاها.

دابا يلا بغيت نطلع التفاعل حتى أنا شنو المواضيع لي نهضر عليهم؟
هانتا القضية ساهلة. بدا نهار ديالك بشي بوسط على فلسطين. وتبعها مور لغدا بشي موضوع على غلاء الأسعار والحكومة، والوزير لي جاك فراسك قول عليه شفار واخا مايكونش عندك دليل، وفلخر سد نهار بموازين. وايلا دخلتي معاها الماسونية تيق بييا سيمانة تولي عندك باج فيها ناس كثر من لي حضرو لميترو بومين نهار السبت.

وباش عرفتي ميترو بومين كانو فيه الناس بزاف. هي كتمشي لموازين؟
لا غي شفت شي سطوريات وفيديوات. مالك باغي تسرحني كي كنسرح ناس فمواقع التواصل؟ خويا نهار كبير هذا، وصل الوقت فين نمشي نبوسطي شي حاجة. لعشية راه زاهية شعبي فسلا. تهلا.