“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

خاي إلياس المالكي مرحبا، لباس عليك؟
الله يحفظك. احنا كنتسناو شنو غيديرو معانا أخويا. ما فهمت والو فهادشي.

شنو مافهمتيش بالضبط؟
حط راسك بلاصتي. طالق ستريم ضاحك مع الدراري حتا تلقى راسك فالحبس وانت مداير والو من الفوق.

هو ماشي مداير والو أخاي إلياس. واخا هكاك داكشي لي درتي للأمازيغ فيه شوية ديال العنصرية أو لا؟
لا مكايناش العنصرية. أنا هداك هو الكونسيبت ديالي. كنضحك ونطنز فأي حاجة. وناس لي كيتفرجو فيا عارفين بلي مكنشجع لا على عنصرية لا كراهية لا والو. حنا ضاحكين لا أقل لا أكثر. ولي كيخليك مفاهم والو هي كتلقى راسك متابع بجرائم إل تشابو ومداروهمش ليه.

احنا هنجيو للجرائم وحدة بوحدة، ولكن قبل نبقاو مع الأمازيغ داكشي لي قلتي عليهم كيبان ليك عنصرية أو لا؟
شوف، ولا حيد هاد شوف، كتفكرني فشي وحدين حينث مابغيتش ندوز معاهم فحوار ولاو نهار كامل وهوما غي حاضييني. لمهم داكشي لي قلت على الأمازيغ ملي عاودت شفتو بصح خايب، ولكن أنا مكانش القصد ديالي، ودرت فيديو قدمت الاعتذار ديالي. ومن الفوق مالي أنا من الموزنبيق، راه حتا أنا أمازيغي. ومن هاد المنبر كنعاود نطلب منهم السماحة. أمازيغي.. أمازيغي…

وبالنسبة للتهم لخرى لي كاينين فحال المخدرات، شنو تبغي تقول على هاد الموضوع؟
آش هنقوليك. عندهم الحق. ولكن شنو كندير غي سبسي مرة مرة الله يعفو علينا وغي كنستهلك باش نضرب فالسقف وتقدر نبقا فالستريم 10 ديال سوايع، وهادشي علاش قلت ليك مافهمت والو، ستريم فيه 10 ديال سوايع خلاوه كامل وشدو ف10 ديال الثواني كنضحك فيها، ولكن هادو لي بغاو فييا الخدمة أنا ليهم بالمرصاد.

كتضن أنه كاين لي بغا فيك الخدمة؟
آه.. وهوما عارفين راسهم. متقولش سميتهم، لي مخليين المغرب بالمشاكل ديالو وحاضييني أنا غي طالقها فسطح، بلاصة مايخرجو يشوفو الناس اللي معذبة، خارجين كايتجاراو عند هاد الجمعيات الأمازيغية باش يدعيوني. وهاد الجمعيات غادين معاهم حتا هوما فهبالهم. سيرو ديرو هاد جهد مع الأمازيغ لي ماعندهم فين يسكنوا والبرد دابا ومكانش عندهم طريق. أودي خليني ساكت هنزيد نغرق راسي وهادوك لي كانو سبابي أنا مزال عند هضرتي هنشريكم بالكابليات ديالكم غي صبرو نخرج.

آجي أخاي إلياس قالو لينا سخفتي فالمحكمة. واش بصح؟
واراه نسخف ونفوتها لهيه كاع، واش متابعيني فحالة اعتقال مالي شنو داير قاتل كينيدي؟ وزيد على هادشي أنا معروف وعندي كاع الضمانات باش يتابعوني فحالة سراح والأغلبية ديال ناس لي دعاوني تنازلو وزيد دابا المحامين إضراب وشوف تالين هنبقا هنا هادشي كامل ومنسخفش.

صراحة عندك الحق أخاي إلياس. ولكن شوف الحاجة لي زوينة، هو عدد من المشاهير تضامنو معاك وهادشي على الأقل كيعاونك معنويا. آش بان ليك؟
واييه.. كاينين صحابي خوتي فحال فودكا والدراري ديال الستريم وحتا شي روابا واقفين معايا من نيتهم، ولكن كاينين لي دايرينها باش نقلب عليهم ملي نخرج ومانبقاش نهضر عليهم راك عارف العاطفة.

على نتا معول تخرج ترجع كي كنتي؟
كي كنت لا، ولكن الكونسيبت غا يبقى هوا هوا.. غي هنبقا نفكر شوية شنو كنقول حينث هانتا كنوجدو نمشي لعب مع بيكي حتا وليت مليوح فلحباس. مايمكنش. واقيلا بسباب هاد بيكي أنا هنا.. حسدوني وضرهم خاطرهم.

الله يدير ليك لي فيها الخير أخاي إلياس، وشنو آخر رسالة تبغي تقولها قبل مانساليو؟
الرسالة ديالي موجهة لأي واحد تقلق على شنو قلت يسمح لييا وحنا غي ضاحكين وهادوك لي حركوها علييا باش تشديت أنا ليكم بالمرصاد “صدام حسين” بلاتي غي نخرج والقضاء حنا معاه لي دارها مرحبا واخر حاجة الله الوطن الملك الشرطة.

حوار افتراضي مع إلياس المالكي: ستريمر شهير