في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

أنس الباز مرحبا، مالك آخويا خارج كتعاير الناس فلايفات. هادشي اللي كا تقول راه من ديما كاين. علاش تال دابا عاد خارج كتهلل. فين كنتي شحال هادي؟
خويا أنا نعاودها ليك كي لخرافة. دابا أنا كنت خدام كيعيطو ليا فالتلفازة والسينما. فهاد الشهر ديال رمضان ما تسوق ليا حد، وشحال هادي ما بقاوش يتسوقو ليا المخرجين وشركات الإنتاج.. طلعت ليهم واقيلا فراسهم حيت أنا واعر عليهم.. المهم، جاتني depression حينت كولشي خدام وأنا لا. فنضت نغوت بحالي بحال خوتي فإنستغرام.

ولكن آخاي أنس. المشكل على ما فهمت ماشي فيهم ولكن فيك انت لي قلبتيها أنفليونسور وولينا نشوفوك فلعراضات كثر من أسماء بيوتي. كاين هادشي ولا ما كاين؟
هي هاد طريق فلول مكنتش باغيها. ولكن قنعوني شي ناس مقربين بالفكرة وقالو ليا راه فيها لفلوس ساهلة، تولي غي بسطوري دخل بزاف ديال لفلوس. ولكن تصيدت. هادا هو سر اللي يتبع العيالات.. ولكن هادشي ما كا يعنيش باللي أنا ممثل خطير وخاصني نكون حاضر ديما فالتلفزة.

واش كا تقصد بالمقربين مراتك القديمة؟
انت ديالنا مهنخبي عليك والو. دابا المدام القديمة ديالي هي لي كانت باغية هاد الدومين. فهي لي شرحات ليا شنو خاص يدار. وأنا حينث كنبغيها درت ليها خاطرها وبغيت نعاونها، ساعة هي تشهرات بيا ومشات وخلاتني أنا حاصل وحتا مخرج ما بقى باغي يخدمني. لقيت راسي ما أنا من المؤثرين ما أنا من الممثلين.

واقيلا ماشي هذا هو السبب. وإلا علاش كنشوفو المؤثرين ولاو كيخدمو فالتلفازة كثر من الممثلين براسهم؟
حينث هاد المؤثرين هوما لي كيخلصو التورناج. والله وما تسالني حلوف، وحدة جبدات 20 مليون باش يكمل التصوير، وزيد عليها كاينة لي كدير لخاطر لتورناج كامل لي طلع ليه شي هورمون كتنزلو ليه. وهادشي راه كيديروه لعيالات. أما الرجال هادوك خلاص كيخلصو بشي طرق إيلا قلتهم خاصنا الموساد يحققو معاهم.

ولكن آخاي أنس سمح ليا حتا انت بحسب مقالو ليا الناس ديال دومين كدير المشاكل بزاف فالتصوير. واش هادشي بصح ولا كا يتبلاو عليك؟
هوما كيفهموني غلاط. دابا إيلا غوت كيقوليك باسل، إيلا جيت معطل كيقوليك فيه لعياقة، إيلا نسيت بلي كاين تصوير حينث كنت سهران فشي كولاب كيقوليك ماشي منضبط. وهاد المخرجين لمغاربة مكيعرفوش يتعاملو مع الممثلين العالميين. آش ندير ليهم…

شكون هذا اللي ممثل عالمي؟
أنا ممثل عالمي. على عندك فيها الشك؟ واش نتا عارف راسك مع من داوي ولا ما عارفش؟

لا ولكن شنو الأفلام العالمية لي شاركتي فيها؟
ماشي مهم واش دور أو غي دزت حدا الكاميرا. وأنا ممثل عالمي بزز من أي واحد. وعرفتي شنو..؟ أنا لي تواضعت وجالس مع واحد فحالك. أما أنا اللي يحاورني خاصو يكون فهوليوود ماشي فالمغرب. صافي وقتك سالا. بسلامة. أنا أصلا ما باغيش نهضر مع الصحافة. اللي بغا شي حاجة يدخل عندي لإنستغرام يدي لخبار. واللي بغا يستاضفني فشي برنامج ولا يدير معايا حوار خاصو يعطيني الفلوس.

ياك نتا قلتي باللي تخدم عندك عباد الله وباللي ما محتجاش للفلوس وعندك رزقك واستثماراتك. ومالك تابع بنادم؟

وي. أنا راه من عائلة الباز.. قولها وشلل بيها فمك. ولكن راه مول التاج كا يحتاج كيما قال المثل. وأنا خاصني نصرف على راسي تانا راه بديت كا نكبر وعندي بزاف ديال المصاريف باش نبان ستار وواعر ومستيلي. مال ميريكان حسن منا. والمهم من هادشي كامل هو نبان فالتلفزة بحال بحال الخوت. ماشي ممثل كا نمثل على راسي فالدار. والنهار الكبير كا نبان فإنستغرام.

ومالك مع فركوس والزملاء ديالك الممثلين اللي خدامين؟ بنتي لينا مكشكش عليهم فاللايف ديالك. واش حسد هاداك ولا كيفاش؟

أنا هضرت على جزار مول الطنجية. ما جبدت حتى سمية. عصبني حيت مدور الحركة واخا هو عبيط. فين ما ندور نلقاه فالتلفزة. أما هادوك اللي كا يمثلو ديما فماشي زملاء ديالي. هادوك غير مخربقين وبزاف عليهم أنا. وبزاف عليهم نحسدهم ويجيني منهم السم. ما كا يعرفوش حتى يمثلو وخايبين. ماشي بحالي أنا بوكوص.

ومال الوزير ديال الثقافة ولا الملك فهادشي اللي جبدتي؟ واش بغيتيهم يقمعو حرية المخرجين في اختيار الفنانين اللي يخدمو معاهم ولا شنو؟ خاصهم يبقاو يجيبوك غير نتا بوحدك؟

بغيت نلحس شوية الكابة تانا ما تعرف تصدق ليا بحال شي وحدين. سمعت الوزير شاب وعندو مع صحاب البوز. أما الملك فكلشي معول عليه يحل المشاكيل اللي عند الشعب فهاد البلاد. من هاديك اللي شدو ليها ولدها فالحبس حيت قاتل درب حتى ليا أنا أنس الباز اللي ما بغاوش يخدموني.

واش ما كا تشوفش آ بّا أنس باللي خاصك تعرف المشكل الحقيقي ديالك فين كاين وتحاول تصلح الأخطاء ديالك وتصالح مع الأنا ديالك ومع الناس وتعرف شنو بغيتي بالضبط؟ ولا بان ليك هاد البلان ديال اللايفات كا يزيد الفولورز فإنستغرام والقضية مسلكاك؟

والله إيلا صدق ليا هاد البلان ديال اللايفات. كا يتشاف اكثر من اللي تشافو الأعمال ديالي اللي درت. والله يخلف على إنستغرام بعدا غا يخليني حاضر وكاين. يالاه سير تكمش وخليني نطلع بشي لايف جديد. قتلتيني بالتفلسيف والهضرة النيغاتيف. الحمد لله اللي ما قلتيش ليا تانتا إنها المخدرات. هادي تحسب لك bro.

أنس الباز: ممثل