“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

السي فركوس مرحبا، مال شي وحدين معاك هاد ليام؟
مرحبا نعام آس.. معرفتش مالهم معايا صراحة ولكن اللي فهمت أنهم قاتلهم السم حينث أنا خدام مزيان ومروج الحركة، وهوما جالسين مشومرين فهادشي ديال ستاغرام.

وما كايبانش ليك آ السي فركوس بللي عندهم الحق؟
لا ماشي من حقهم. الأرزاق بيد الله، وانا خدمت على راسي وضربت تمارة فهاد الفن. وانا مرضي الوليدين ولي مرضي ميمتو عمرو ما يتخص.

خلينا من الدقة المراكشية آسي فركوس. كيفاش ناس قاريين التمثيل ومكيلقاوش يخدمو ونتا لي بينك وبينوا غي الخير والإحسان فينما ضرنا نلقاوك. علاش زعما؟
الفرق هو بلي هادو لي قاريين كيبقاو يتسناو المخرجين والمنتجين يعيطو ليهم ويقراو السيناريو ويفهمو الشخصية. أنا مكنديرش هادشي. لي قاليا نخدمو كنقوليه بسم الله. هادشي علاش عزيز عليهم يعيطو ليا حينت ما فياش قوة لفهامات. وهاد الطريقة موكلاني طرف ديال الخبز ملي بديت نهار اللول مع فرقة الوفاء.

بمناسبة فرقة الوفاء. كيفاش حتى خدموك معاهم واخا ما عندك علاقة بالتمثيل؟
فرقة الوفاء كانو كيقلبو على ممثل لي كيشبه لبلقاس اللي ما بقاش بغا يمثل معاهم. وباقي نعقل جابني عبد الجبار الوزير من مارشي ديال الجملة فاش ترقيت من كسال لخضار. وملي شافوني قالو هو هذا لي يصلاح. توكلت على الله وهاكا بدا المسار ديالي. واخا ما كنتش كا نشبه لبلقاس فالموهبة ولكن كنت غليض بزاف بحالو. وهادا ما كا …

واش آسي فركوس مكاتجيكش ناقصة تلاح لدومينات ماشي ديالك. حينث مع احترامي لكاع المهن، ولكن من كسال فلحمام مثلا لمخرج راه تكسيلة ديال بصح هادي؟
سمعني مزيان شنو هنقوليك ودوقني أمعلم.. أنا حياتي كاملة غي كنتلاح على لخدامي. ماقريت لا تاجزارت لا تاكسالت لا تمثيل لا إخراج لا هم يحزنون. ولكن عندي الجبهة وكنزعم وكولشي بالزعامة كيصدق.

إيوا التمثيل نسرطوها بجغمة ديال الما، كوثر بامو وكتمثل دابا. ولكن الإخراج رجوع الله. ما بانتش ليك هادي قاصحة شوية؟
ما قاصحة والو. راه انت تولي مخرج إيلا بغيتي من غدا. دير غير النية وصفي قلبك وهيخرج داكشي زين.

هادشي لي قلتي إيلا كنتي باغي تزوج، أما المخرج راه خاص تكون عندو رؤية وأفكار ورسائل كيدوزها فلأفلام ديالوا، وهادشي راه بعيد على طلق فروج ولا تكري طموبيل ديال لموتى وتبقى تابعها بكاميرا لفيلم كامل. فمكايبانش ليك أنك تبعد على هاد الحرفة حينث صراحة مكرفس عليها؟
علاش هانبعد؟ وهادي زينة عاوتاني.. فراسك آمعلم بلي هذاك لفروج لي كضحك عليه ملي خرج كان هو اللول فل box office، وديك طموبيل ديال لموتى راه شاركت بيه فالمهرجان الوطني للسينما، زير معانا الله يرحم باك.

واخا آسي ستانيسلافسكي، غي هو راه فالمهرجان ما ديتي حتا جائزة واللول فل box office ب 100 ألف راه أعبط حلايقي فجامع لفنا كيديرها فنهار، لمهم نسا. دير لي بغيتي. ولكن كيفاش آسي فركوس عندك جوج شركات ديال الإنتاج؟
آهيا.. آش هاد لملاغا؟ مكاينش هادشي. أنا نشرح ليك. أنا عندي وحدة وثانية ديال واحد السيد صاحبي تعاونا معاه وصاوبناها ليه وانا غي مدير الإنتاج فيها. وا هنينا من هاد الأسئلة اللي كا تجبد الصداع.

واخا. حتا هذا نظر. واخا هادشي راه تخلويض وفيه تحايل وفنفس الوقت حتا أخلاقيا مامقبولاش حينث مكاينش تساوي الفرص فهادشي، ولكن واخا آسي فركوس أجي نخرجو حنا من هادشي كاع. بحسب الناس لي خدمو معاك انت ديما كتبين بلي انت هو النجم ديال العمل وكتعامل خايب خصوصا مع التقنيين واش بصح؟
لا أبدا.. غي ناس الله يهديهم أنا كنبغي ماكلتي راسي، ومكنبغيش نوصل لبلاطو فلوقت حينث عندي طنجيتي وشوايتي. كنجي نلقى كولشي واجد نقضي الغراض ونزيد فحالي، را كاين عندي بزاف مايدار مهنجيش نضيع وقتي فتوجاد للمشهد لي عندي، ونفس لحاجة ملي كنكون مخرج كنبغي نوصل نلقى كولشي كاين وانا نقول غي action و couper.

وعلاش بزاف ديال الناس لي وقفوا معاك النهار اللول خرجو من بعد كيتشكاو بلي نكرتيهم وقلبتي عليهم وجهك؟
هو ماشي قلبت وجهي غي الوقت مكايناش وصافي، ونزيدك إنسان مريض أو كيموت آش هندير ليه أنا.. وهوما كيصحابليهم بلي حينث وقفو معايا وخدموني هنبقى حاضيهم ونصرف عليهم. راه لفلوس هادي مكنلقاوهاش طايحة آلمعلم.

سي فركوس كاينة ظاهرة التحرش بزاف فالمجال الفني. آش بان ليك فيها؟
أنا بعدا لا علاقة لي بالموضوع!! يمكن تتتحرش!؟ اهو هذا أمعلم خليناك على خير.. والله يسهل عليك فهاد لبيعة وشرية ديالك.. هاد لمزاح ديالك مابقيت قادر نصبر عليه. ها واحد السلام عليكم.

عبد الله فركوس (فكاهي)