“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

الشيخ سار مرحبا. تقدر تحط داك تليفون عفاك باش نبداو الحوار؟
السلام عليكم. واخا أخي كنعتذر.. غي مع متبع التطبيق خصوصا أنه الإخوان والأخوات فتزايد ولله الحمد.

على ذكر التطبيق، خرج أمين رغيب وقال بلي بزاف ديال الناس تعرضو للابتزاز والنصب فالتطبيق ديالك، وملي تواصل معاك قلتي ليه بلي ماعندك مادير حينت النية ديالك هي يتزوجو، واش بصح هادشي؟
فعلا هادشي وقع وتواصل معايا الأخ أمين لي طلع ماشي أمين حينت شوهني فسطوري. واش دابا وحدة رسلات صور ديالها لشخص فالتطبيق، أو واحد هيدخل باسم فتاة أنا سوقي؟! هوما لي خاصهم يتعاقبو ويتلامو. أنا بعيد كل البعد على هادشي.

والناس لي حاسبين راسهم ولي أمر وحاطين معلومات الأخت أو ماعرفتش شكون هاديك، وكيتافقو على الزواج بلا الموافقة ديال الإنسانة المعنية بالأمر، واش هذا ماشي هو الاتجار بالبشر؟
يا أخي الله يهديك. علاش هاد المصطلحات لي كيصيفطو للحبس، هادشي راه شرع الله. من حق ولي الأمر يزوج الأخت أو الابنة ديالو، فمتبقاوش تروجو لشي أفكار شيطانية مخالفة للدين جزاكم الله خيرا.

هاد الدين رديتوه شماعة لي دار شي مصيبة يجي يقول هادشي كلام الله. واخا وبالنسبة للزواج لي رجعتيه auto école، هادشي حتا هو كلام الله؟
لا هذا اجتهاد مني، حينت المرأة فحال السيارة، الراجل إيلا معرفش يسوقها هيدير كسيدة، وحنا كنحاولو نعلموه سياقة المرأة والتعامل مع مؤسسة الزواج باش مايخشيهاش فحيط، وملي كينجح فالامتحان كنعطيوه الرخصة.

انت لي غادي تخشيهم فشي مصيبة غي زيد.. وشنو كتعلمهم بالضبط فهاد البيعة وشرية، حينث بحسب المعلومات ديالي انت قاري فالتكوين المهني، ماشي تكوين الأسرة؟
هادي سميتها التجارة وهي حلال، أما بالنسبة لشنو قاري، أنا قاري كلام الله. أعظم ما نزل. وطبعا ما كاين ماحسن من خالق الكون والتعاليم ديالو فتأسيس أسرة ناجحة.

هاد التخريجة مامسلكاكش حينث بحسب ما عارف عليك أنك ما شيخ ما فقيه وحتا ديك شيخ سار غي نسبة للاعب ديال الرجاء، فكيفاش كتجتاهد وتفتي من الفوق؟

ساهلة. أنا كندخل غي ليوتوب وكنشوف الشيخ لي هضرتو غادية فنفس التوجه كنخدم بيها، وفحالة كان داكشي ماهواش غنسبيها فيه وأنا قاضي حاجتي. مالك معقد الحياة؟ راه الدنيا مكتسواش حتا جناح بعوضة. خلينا نعيشو مزيان.

واخا انت تعرف. وبيناتنا حتا لي كيتبعك وتايق فيك سرو نيت، وبالنسبة لموضوع المرأة الموظفة اللي داير عليه حالة، شنو المشكل إيلا كانت المرأة خدامة؟
هذا كفر، المرأة المكان الوحيد ديالها هو المنزل، وأي واحد كيسمح للزوجة أو الابنة ديالو تخدم هو ديوث، حينث كيفاش ترضى لزوجتك التعامل مع رجل براني وتواجد معاه فنفس المكان وحنا عارفين قول أشرف الخلق لي كيقول: لا يخلون رجل بامرأة، فإن الشيطان ثالثهما. وزيد على هادشي أنه التواجد ديال المرأة فسوق الشغل هادشي كيخلي فرص الرجل فالعمل أقل، يعني مكاينش كيفاش يتزوج، يعني نسبة العنوسة غادي طلع، يعني غادي يولي الفساد، يعني هيكثرو ولاد لحرام يعني..

يوو chill, هادشي راه فالمخيلة لمريضة ديالك، حينث أول حاجة لبيرو فيه ناس خرين ماشي برتوش، وماشي كولشي كيشوف المرأة فحالك، واش فراسك أنه الدول الإسلامية فحال أفغانستان وباكستان لي المرأة فيها حرفيا مكتخرجش وملي كتخرج كدير النقاب هوما أكثر الدول فالعالم فيهم التحرش والاغتصاب؟
المرأة هي السبب. مخاصهاش تخرج أصلا. يا أخي راه المرأة فتنة وفتنة كبيرة، ماعرفتش كيفاش كتقدرو تواجدو فنفس المكان معاهم.. زائد أنها كتكون متبرجة من الفوق فحال هاديك لي كانت جالسة حداك، ملي جيت وأنا كنحاول نسا الابتسامة لي استقبلاتني بيها، ولكن مقدرتش مازال لاصقة ليا فعقلي لدابا.

حالتك صعيبة. خاصك تشوف شي طبيب فالصراحة. خلينا من المرأة حينث فهمت المشكل فين عندك. وكنضن حتا ناس عرفوه، نتا فالأول كنتي باغي تولي رابور ولحسن الحظ حبستي، الموسيقى بالنسبة ليك حلال ملي ديرها انتا وملي ماتقدرش عليها تولي حرام؟
الموسيقى حرام ورجس من عمل الشيطان، أنا كنت كندير موسيقى حلال وهادفة، لي من خلالها كنت كنعبر على هموم الشعب وكنشر فيها الإسلام، وهادشي ماشي حرام، عكس روابا والمغنيين لخرين لي كيحثو الناس على المعصية بالكلمات والألحان ديالهم. هادشي حرام وفيه إثم كبير واللي كيديرها فهو كافر.

دابا انت من هاد الحوار صراحة عرفت بلي إنسان لي مفقود فيه الأمل، ولكن غي خرج من هادشي ديال دين وجي لناس نيشان وقول باغي ضبر على راسك ودخل فلوس. علاش لي مسلكاك كتحللها لي مقدرتيش عليها كتحرمها؟
اه أنا التطبيق درتو بغرض ندخل لفلوس، والمرأة بنسبة لييا الدور الوحيد ديالها فالحياة هي تلبي الحاجيات ديال الرجل، والموسيقى حرام ولي ماعجباتوش هاد الهضرة كافر.

كايبان ليا تمشي فحالك احسن، وحيد ديك الضحكة الصفرة وداك تعواج لوجه لي كتجاوب بيه حينث مهنقدرش نشد الأعصاب ديالي كثر من هاكا.
الله يهديك أخي، ممكن طلب بنسبة للآنسة لي تبسمات ليا. ممكن نتعرف على ولي أمرها ؟!!

سير غي تق…

الشيخ سار: يوتوبر صاحب تطبيق “المعقول”