لمدابزة اللي وقعات نهار الخميس فالعاصمة الهولندية أمستردام بين جماهير فريق مكابي تل أبيب وجماهير أجاكس أمستردام لي كان عدد كبير منهم من الجالية المغربية، ما هي غي تأكيد ديال أنه الإنسان بالطبع ديالو، واخا يعيا ما يدير فيها كيوت، غي كتعطيه الفرصة فين يرجع للطبيعة الحيوانية ديالو كيستاغلها وكيلوح كاع دوك المصطلحات فحال الإنسانية، السلام والتعايش لي تختارعوا أصلا غي باش نقولوهم نفاقا ملي نبغيو نبانو زوينين قدام بعضياتنا، أو نتخباو موراها حينث ببساطة ماعندناش الجهد على لمدابزة لا أقل ولا أكثر.

نتبوردو على عباد الله

حينث إسرائيل لي اليوم كيديرو كوارث فغزة، هوما هوما لي كانو كيقولو على هتلر مجرم، وكانو كايقولو بلي الهولوكوست جريمة ضد الإنسانية ملي كانو ضعاف، فماعندهمش اختيار آخر من غير يتخباو مور هاد المصطلحات. وحنا بدورنا كنديرو نفس الحاجة دابا، ونهار نكونو قوة عظمى وقادرين نتبوردو على عباد الله فمتأكد أنه مهانخليوش من جهدنا باش نديرو مجازر “محترمة” فحال لي سبقونا.

جدودنا الهوموسابيانز

فمن اللخر الإنسان آخر حاجة يقدر يكون كيآمن بيها هي الإنسانية من جدودنا الهوموسابيانز لي باش يبقا بوحدو فالكرة الأرضية دار مجازر للأجناس لخرين لي كانو مشكلين ليه خطر، مرورا بالحروب والمجازر لي لكتوبة ديال التاريخ عامرين بيهم، ومزال لخير جاي لقدام. وهنا كاينين شي أسئلة لي منضنش عندهم جواب دابا. واش ممكن الإنسان يتبدل فالمستقبل ومايبقاوش حروب ولقوي ياكل الضعيف؟ واش ممكن الإنسان فشي وقت يتعلم يحل المشاكل ديالو بالحوار بلاصة الحرب؟ واش ممكن توصل شي وقت اللي البشر يقدرو يتعايشوا مع بعضياتهم ويتقبلو الاختلاف ويتعاملو بالإنسانية ومايتعاملوش باللون ديال البشرة أو الدين؟