لبارح السبت فالرباط سالا مهرجان مهم وواعر هو “فيزا فور ميوزيك”، بمجموعة ديال العروض المميزة فمسرح محمد الخامس، اللي قدموها الفنانين المشاركين فهاد الدورة 11، ومن بينهم جين كوطي وكوثر صديقي، اللي دارو عرض موسيقي مزجو فيه بين الأغاني المغربية وموسيقى التيكنو، والرابورة المصرية “دارين” اللي قدمت مجموعة من الأغاني تفاعل معاها الجمهور، إضافة إلى المجموعة الموسيقية الأمريكية “أركاي” اللي متعات الحضور بقطع موسيقية من الثقافة الموسيقية الآسيوية.

ندوات مهمة

الاختتام شاركات فيه مجموعات أخرى زوينة بزاف، بحال “مونيكا للجاز العربي” اللي قدمات عرض فوزيونات فيه الجاز مع البلوز مع الأفرو والألحان العربية و”يوربان فولكلور” المغربية.

ومن غير العروض الموسيقية، نظم المهرجان ديال “فيزا فور ميوزيك” ندوة بمتحف محمد السادس للفن الحديث والمعاصر بالرباط، حول موضوع استكشاف الصناعة الموسيقية وطريقة تسويق الموسيقى الإفريقية للعالم، بمشاركة فنانين ومختصين في مجال الإنتاج الموسيقي واختتم 3 يام ديال الندوات والماستر كلاس اللي بينات باللي هاد المهرجان مختالف على المهرجانات الموسيقية لخرى.

صناعة موسيقية

مهرجان “فيزا فور ميوزيك” مكايجيبش مغنيين معروفين، ولكن كيجيب فنانين يالاه باديين من العالم كامل وكيعطيوهم فرصة يلعبو الموسيقى ديالهم فدي سين كبار فحال مسرح محمد الخامس أو رونيسونس وقدام عدد كبير من الناس. والحاجة الثانية لي زوينة أن المهرجان هو الوحيد فالمغرب اللي كا يركز كثر على الورشات التدريبية والماستر كلاس لي كيديروها مؤسسات وشركات كبيرة فمجال الصناعة الموسيقية فحال سبوتيفاي وهيبا لاب.
وهادشي علاش الفنانين لي معروضين ليه من العالم كامل كيكونو هوما اللولين جايين يستافدو من هاد الماستر كلاس، إلا دياولنا لي نهار كامل مكاتشوفهومش ولكن غي كتبدا الآفتر كتلقاهم هوما اللول فلكونتوار. وفللخر يطلع يقوليك مكاينش لي كيورينا كيفاش نبيعوا الموسيقى ديالنا.
فالخلاصة “فيزا فور ميوزيك” الدورة 11 كانت مزيانة سواءا فالتنظيم أو الحفلات لي دارو. ونبغيو أنه يكونو عندنا مهرجانات كثر فحالو لي فعلا كايحاولو يدفعوا باش تولي صناعة موسيقية على حقها وطريقها فالمغرب. ونتماو أيضا الفنانين ديالنا يعرفو الأهمية ديال هاد الفرصة لي كاتجيهم ويستافدو منها كي كاديرو الناس لخرين.