“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

السلام السي اللحية آش خبارك؟

وعليكم السلام أخي. الحمد لله على كل حال.

مالك بنتي ليا مخربق؟ هادشي كامل بسبب المدونة؟

وا هادشي لي دارو هاد الناس مايبغيه لاربي لاعبدو. تخيل معايا تكون سي السيد ومن بعد يجيبو يركبو مرا فوق منك وتولي تقوليك ليمن ليمن، ليسر ليسر. كي غادي تحس؟

ولكن راه ماشي هادشي لي كاين فالمدونة، باش مانبقاوش كنهضرو فلخوى. قولي شنو ماعجبكش فيها؟

نبداو بالتعدد، دابا المرا تولي هي تقولي واش نتزوج عليها ولا لا. هادي منطقية؟ الله عاطينا لحق نتزوجو وهادو يقولو لينا لا.

هوما عطاوها تعزل من اللول، يعني إيلا كنتو متفاهمين باش تزوج عليها من اللول راه هاتكتبوها فالعقد وتزوج شكون شدك؟

كيفاش نتفاهمو من اللول؟ واش انت بعقلك؟ راه الزواج الثاني والثالث حلاوتو هو تكون دوزتي مع المرا اللولة شي بركة وملي كتقنط كا تبغي تبدل، ماشي من اللول وا فهمني.

هاد الهضرة تقدر تقولها على قميجة ماشي إنسان آ السي اللحية، المهم زيد شنو آخر معاجبكش؟

نبقا معاك فالزواج نيت، دابا أنا إيلا بغيت نتزوج خاصني نستنى حتا تشرف ودير هي 18 لعام. راه تخربيق هادا.

هي تخربيقة صراحة حينث 18 لعام راه أصلا مزال صغيرة على الزواج، دابا أنا نبغي غي نفهم آش كيعجبكم فبنت فهاد لعمر؟

شنو هوا؟ راه هادا هو لعمر ديال زواج، كتكون السيدة عندها الجهد وتربيتها على يديك. اللي قلتي ليها ديرها وتكبر هي وولادها فدقة وحدة.

هي عندها الجهد باش تلعب وتكتاشف الحياة ماشي باش تغرق فمسؤولية ماتشوف ماتشوّف فالدنيا، دابا المدونة معاجباكش حينث حرماتك تزوج ببنت صغيرة وتدير فلمرا اللي بغيتي بلا مايهضر معاك شي حد؟

لا ماشي غي هادشي. دابا سيدي حتا الطلاق قالك باش تطلق خاصك تقسم معاها وتبقى تصرف عليها هي وولادها واخا تزوج عاوتاني.

راه ولادك حتا انت. وهاد القضية مامحتاجاش قانون أصلا باش ديرها. حينث لولاد راك خاصك تصرف عليهم من باب الرجولة قبل أي حاجة اخرى. فين المشكل؟

المشكل هو أنها هي تمشي تزوج مع راسها وتعيش حياتها وانا نبقى نصرف. واش انت هبيل؟

ويصرف راجل آخر على ولادك عادية؟

لا مايصرف عليهم حد راه حنا بنفسنا، ولكن هي ماتزوجش. إيلا تزوجات تضبر راسها. مالي أنا لي نبقا نصرف.

يعني انت تمشي تفطح وتعيش وهي تبقى مع لولاد وتدفن راسها حية؟

أنا راجل ندير لي بغيت. المرا الدور ديالها هي تقابل ولادها ماشي تعطيها للزواج. هادي راه ضسارة. ولكن لهم مدونتهم ولنا مدونتنا.

راه الضسارة ديال بصح هي الهضرة لي كا تقولو. واش كيصحابلكم السيبة فلبلاد لي بغا يدير شي حاجة يديرها، القانون على كولشي وكولشي خاصو يحتارمو ولا ساهلة هزو حوايجكم وسيرو أفغانستان راه دايرين فيها هادشي.

حنا معاكم هنا بت نبت، ولي بغينا نديروه نديروه الله معانا ولي فجهدو شي حاجة يديرها.

آودي أخاي اللحية. الله كون كان مع هادشي لي كاتقول، كون عطاكم عقل فحال الناس كاملين. بسلامة. ‎