العقوبات البديلة اللي من المقرر أنها تدخل حيز التنفيذ فغشت الجاي، ملي خرج الخبر بدات الهضرة عليها. وهااللي كيقول صحاب لفلوس مايبقاوش يدوزو لحبس هااللي كيقول باغين يرجعوا السيبة فلبلاد وكل واحد كا يلغي بلغاه. فآجي نشوفو شنو هي العقوبات البديلة وشنو الهدف منها وفلخر تحكمو واش مزيانة؟
العقوبات البديلة بكل بساطة هي أنه شي واحد دار جريمة بلاصة مغادي يدوز واحد المدة فالحبس فراه كيدوزها فدارو وكيخلص غرامة ديال لفلوس وأيضا كيدير واحد الخدمة اجتماعية فحال يخدم مؤسسة خيرية أو دار المسنين ولا ينقي الشوارع فديك المدة اللي كايكون محكوم بيها. والتحركات ديالو راه كايكون مركب براسلي (سوار إلكتروني) اللي لايمكن يحيدو ويلا مشا حتا محتارمش لبلاصة اللي خاصو يكون فيها راه كيديطيكطا.

ولكن ملي كنقولو جريمة راه ماشي جرائم اللي كبيرة فحال قتل ولا البيع والشرا فالمخدرات والجرائم اللي العقوبة ديالها فيها كثر من خمس سنين ديال لحبس وأيضا حالات العود، ولكن المقصود هي جرائم اللي الضرر ديالها محدود ولا الجرائم المالية فحال شيك بدون رصيد.
وهاد العقوبات البديلة الهدف منها هو مايبقاش اكتظاظ فلحباس وطبعا الدولة والمجتمع تستافد من الشخص بلاصة ماتبقى مجلساه فلحبس موكلاه ومشربا، زائد أنه داك الشخص اللي مدايرش شي جريمة كبيرة، ملي مهايدخلش لحبس مغاديش يتعرف على مجرمين ديال بصح ويخرج موراها مجرم برو ماكس، بالإضافة لأنها غاتمكن الشخص يرجع لحياتو العادية مور مايسالي العقوبة بلا ماتلصق ليه ديك ليتيكيت ديال حباس.
فالخلاصة. العقوبات البديلة الهدف منها هو تخفف الزحامات من لحباس وتعزيز العدالة الإنسانية وتنقص ديك ديال واحد داخل خارج من لحبس على والو وهادشي دول العالم كامل اللي خدامين بيه وصادق ليهم.