جام شو سيزون جوج، بما أنهم وصلو فيه لدومي فينال، فجا الوقت اللي نقولو شكون داه، وباش يصلحو هاد القضية فالمواسم الجاية والفينال يديرو ليه كي كيديرو كاع برامج اكتشاف المواهب، يدوزوه لايف ولا يصوروه فنفس السيمانة على الأقل. ولكن قبل ما نقولو شكون داها هاد لعام آجي نشوفو شنو لحوايج الزوينين والخايبين اللي كانو.

وأول حاجة كانت مزيانة هاد العام هوما لجنة التحكيم اللي كان فيها دون بيغ وشوبي اللي فعلا بانو أنهم ناس فاهمين شنو الدور اللي خاص تلعبو لجنة تحكيم فبرنامج اكتشاف المواهب والملاحظات ديالهم كانت فمحلها حينث كانو كيعلقو على لفلو لكتابة ولبيرفورمونس ديال الرابور وكانو بعاد على داكشي ديال لحوايج وكي كانقولو بالدارجة ما غا ضربهمش على الشعا بلبسة.

نيفو المشتركين طالع
وثاني حاجة هوما المشتركين اللي كانو هاد العام النيفو ديالهم حسن من العام اللي فات، والمشاركين كان النيفو ديالهم طالع وعدد من اللي تقصاو كون شاركو لعام اللي فات كانو غادي يديوها بلا مايعييو راسهم.
أما لحاجة الخايبة اللي خاص جام شو يردو ليها لبال فالسيزون الجاية هي هاد القضية ديال يصورو كولشي قبل، حينث غادي يتعرف شكون اللي داها واخا يعياو مايخبيو. والمشكل أنه كيتعرف حتا قبل مايبدا يدوز البرنامج. فالموسم جاي خاصهم يلقاو حل.

اللي داها يستاهل

أما بالنسبة اللي داها فهو “أيو آدر” واللي يستاهل، حينث ملي بدا لبرنامج وهو برايم على برايم كيطلع نيفو وزيرو غلط.
فلخلاصة جام شو هاد الموسم حسن من الموسم اللي فات بزاف وفعلا فيه دراري اللي أكيد أنهم مور لبرنامج غادي يزيدو يديرو بلاصتهم فالراب المغربي وهادشي عكس العام اللي فات، اللي المشاركين اللي كانو فيه، مع طفات تلفازة طفاو حتا هوما معاها.