“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.
وا المهداوي.. واش كا تعتبر راسك بصح صحافي؟ حيت كاينين شي ناس كيقولو بلي داكشي لي كدير بعيد كل البعد على الصحافة ؟
سلام عليكم خوتي لمغاربة. ودابا انت كتقول بلي المغاربة مفاهمينش حينث لمغاربة كيبغيوني وكيقولو عليا صحفي. يعني انت دابا كتشكك فالذكاء ديال لمغاربة.
المغاربة را 40 مليون. واش كلهم كا يبغيوك وكا يتبعوك؟ دابا جاوب الناس واش انت كتعتابر داكشي لي كدير صحافة؟
اه صحافة. وهادي هي الصحافة أصلا اللي خاصها تكون. أنا عندي جوج إجازات وماستر؟ ونتا شنو عندك؟
عندي كونجي. شنو هيا الصحافة عندك آ المهداوي؟
هيا ديك جيب آ فم وقول اللي كا يبغيو خوتي لمغاربة. قالو عليها صحافة يعني صحافة، أنا ولد الشعب ولي قالوها خوتي لمغاربة أنا معاهم. مالك يحساب ليك الصحافة هي تكتب المقالات والربورتاجات وتتحقق من مصدر الخبر وتبعد على التشهير والسب والقذف.. هادشي راه قديم وماشي مواكب لعصر اليوتوب. فيق معانا.
واش نتا فعلا مع لمغاربة ولا مع الأدسنس؟
معاهم بجوج. غير جي وطلع الأدسنس مع لمغاربة. هاي هاي… خاصك تكون سيدي ومولاي وتعرف كيفاش تهضر معاهم وتكون خبير فالتجعويق وتخراج العينين وأهم حاجة ما تخليش لبنادم فين يدوي.. كاين غير التنقاز باش يبان ضعيف عليك.
تبارك الله مدرسة السي المهداوي… آجي.. كيفاش نتا عندك سوابق وعندك بطاقة الصحافة؟
حينث الجريمة لي عندي هي جريمة فرعية. وحينت فالأصل مؤامرة عليا باش نسكت على الحق.. آجي نتا ياك يالاه عجبتكم مع الشيخ العمري ودرتو عليا فيديو كاع فالموقع ديالكم. دغيا قلبتو وجهكم…
كاينة ولكن ما سمعتيناش فاش قلنا باللي ما عندناش معاك ولكن مع العمري عجبتينا.. ولكن كيوتوبور.. زيد عليها ما عندناش مع الشيوخ أصلا. ولكن غي خليك فالموضوع، واش انت وليتي كائن إفتراضي لدرجة وليتي كتعيط لناس توريهم شنو يديرو فيوتوب؟
لا. أبدا تبدان. وإيلا عندك شي دليل جبدو. أما تبقاو غي تهضرو هكاك حشومة را لمغاربة عايقين وهادشي ميدوزش عليهم.
على ماشي عيطتي للخراز وقلتي ليه يبان مع مراتك باش يطلع ليها القناة اللي طلقاتها. كا ولا ما كا؟
الخراز !! مراتي !! منين جبتي هاد لخبار؟ هادي مؤامرة.
الصحافي مكيعطيش لمصادر ديالو أسي الماستر، وحنا كا نسولوك دابا قولينا أش وقع؟
الخراز عزيز عليا ونقدر نكون صونيت ليه نطمئن على صحتو في إطار المنافسة الشريفة مع الزملاء فيوتوب. كرشي ماشي كبيرة ونبغي مرتي تدخل الأدسنس تا هيا حينث انا مكنبغيش ناكل غي راسي. وخيرنا ما يديه غيرنا. ولاش الخراز لاش؟ نطلع معاها أنا نيت.
سي حميد فاش كنشوفو الفيديوات لي كدير كنلقاو بزاف ديال الهضرة وزيرو معلومة، زيرو موقف، زيرو رسالة. فين هي الصحافة فهادشي؟
شوف .. أنا صحافي بزز منك ومن لي مصيفطينك، والمغاربة را فاهمين. وانا كنقول للناس داكشي لي بغاو، وداكشي لي كيقولوه وعارفينو، وهادي هي الصحافة. وسير انت ودوك لي كتحاربو المغاربة وكتقولو داكشي لي مكيبغيوش ناس وكتخدمو أجندات فضائية ميتافيزيقية سريالية. حنا عايقين بيكم.
واخا السي حميد. كنضن بلي باينة شنو السبب لي خلاك تولي من يساري لإسلامي وغدا تقدر تبدل الفيستة تاني. شكرا على الحوار لي مافيه حتا معلومة مفيدة.
كا تقصد باللي أنا بايع الماتش؟ هاجمتيني وهاجمتي لمغاربة اللي كا يآمنو باللي الراس اللي ما يدورش كدية. وانا منسمحش ليك، وغادي نحيدك من اللايف… بغيت نقول غادي نقطع عليك التلفون. أصلا ما كانش خاصني نجاوب موقع صغير يالاه طالع، أنا مول القناة المليونية. باينة عليكم جاكم السم مني، ولكن طرطقو.
بصحتك السي حميد. نتا حيت صحافي داكشي علاش عندك الملايين. أما حنا غير منتحلين صفة.
آجي واش عندكم لاكارت ديال الصحافة بعدا…؟ عندكم شي ماستر ولا شي إجازة…؟ والله تا نهبطكم.
حميد المهداوي: يوتوبور مغربي
التعليقات 0