“في هذا الحوار الافتراضي، نستضيف كل مرة شخصية معينة، تعذر علينا محاورتها، إما لأنها لا تتواصل مع الصحافة، أو لأنه من الصعب الحصول منها على تصريحات أو أجوبة عن أسئلتنا، لأسباب خارجة عن إرادتنا وإرادتها. يتعلق الأمر أيضا بحوارات افتراضية لا تخلو من نكهة سخرية، قد تكون لاذعة أحيانا، لكننا لا نقصد من وراءها أي نوع من الإهانة أو التشهير، وكلنا أمل أن يكون أبطالها من أصحاب “القشابة الواسعة”.

الركراكي مرحبا بيك، عارف مكتبغيش لي يسولك أسئلة قاصحة ولكن اليوم غادي تصبر معانا. ياك؟
سلام خويا. ماشي مشكل. أنا درت النية وجيت عندكم.

نبداو بهاد النية نيت. واش عادي آ السي وليد المدربين ديال العالم كامل كيهضرو بالخطة وطاكتيك وانت نهار كامل جالس علينا النية والحب ورضات الوالدين وهاد المصطلحات ديال الكوتشينغ والتنمية الذاتية ؟
هادشي هو لي خلانا نكونو الرابعين عالميا. ولا نتوما دغيا كا تنساو. أما الخطة والطاكتيك، هادشي ملي درناه كنا كنخسرو الماتشات.

حتا دابا بهاد النية لي كتقول را كنخسرو. المهم آش كنتي كدير مع اللعابة ديال المنتخب الأولمبي، شكون المدرب ديالهم انت ولا السكيتيوي؟
رسميا طارق السكيتيوي هو المدرب ديالهم، ولكن أنا كنبغي نوريهم شنو يديرو حينت أنا المشرف على المنتخبات كاملين. وأنا تكلاسيت الرابع فكأس العالم، فكا نقول لطارق شنو يدير. وهادوك الدراري راه دياولي من هادشي كامل.

هو وريتيه جوج ماتشات خسر فيهم، انتا المشرف ولكن هادشي واش كيعطيك الحق تهضر مع اللاعبين مباشرة؟
هو معنديش الحق ولكن كنشوف لمغاربة بداو يهضرو على طارق ونساو قطر وراس لافوكا فجيت للتدريبات ونزلت عند اللعابة باش نبان حتا أنا فالصورة.

الناس كيقولو انت لي خسرتينا ضد اسبانيا حينث قلتي لدراري يدافعو. واش بصح؟

بصح حينث هادي هي الكورة، الدفاع ثم الدفاع، خصوصا ملي نكونو رابحين. وهادشي لي وصلنا الرابعين فكأس العالم. ولكن الخطة ديالي مكانتش فيها النية والحب.

السي وليد كرهتيني وكرهتي لمغاربة فهاد كأس العالم والنية، ودابا ملي تقصينا شكون هيتحمل المسؤولية انت أو السكيتيوي؟
طارق هو لي يتحمل المسؤولية، أنا ماشي مدرب ديال الأولمبي وايلا قال العكس ساهلة هنجري عليه كي جريت على لي قبل منو. أنا الرابع عالميا.

السي الركراكي آخر سؤال. كأس إفريقيا لي جاي هيكون فالمغرب وكنضن أنه لمغاربة كيتسناو اللقب. واش موجد شي خطة مزيانة ولا ناوي تخرج علينا؟
الخطة ديالنا هي الدعاء ديال لمغاربة ورضات الوالدين، وبالنية والقلب لبيض هضرب كورة فبوطو ديالنا وتخرج، وحنا هضرب فبوطو ديالهم وتدخل.

شكرا ليك السي وليد. واش هنقوليك؟ نتلاقاو فكأس إفريقيا ونشوفو هاد تخربيق ديالك فين هيوصلنا. واخا النتيجة باينة.

وليد الركراكي (الناخب الوطني)