عبر الرابو عدنان ماحيو، المعروف ب”دراغانوف”، على السعادة ديالو بالمشاركة فمهرجان موازين الدورة 20، وقال باللي هاد الدورة خلاتو يرجع بيه الوقت عشر سنين لور ملي ربح مسابقة جيل موازين 2014.

وفالندوة الصحفية ديال لمهرجان اللي دارت اليوم الخميس، قال “دراغا” أنه فنان اللي كيهتم بحاجة وحدة هي الخدمة، وكيفاش يقدر كل مرة يخرج عمل اللي يعجب الناس. أما بخصوص لهضرة اللي قال عليه “المورفين” فأكد أنه فعلا خدا 3 ديال الجمل من أغنية الرابور الفرنسي”يوسوفا” ولكن مكانتش عن قصد.

“طوطو يستحق يطلع فمنصة السويسي”

وزاد دراغانوف قال أنه ماداخلش فكلاش مع “المورفين” حينث ماشي مهم، ولكن هو مركز على أمور أخرى، فحال كيفاش يقدر يكبر الصناعة الموسيقية وأنه يدخل منها لفلوس اللي يستحق.

وختم “دراغانوف” الندوة الصحفية ديالو بالمشاركة ديال الرابور المغربي وصاحبو إلغراندي طوطو” لمنصة السويسي كأول مغربي، بلي عاجبو الحال وماتفاجأش، حينث بحسب التعبير ديالو “إيلا ماشي طوطو اللي غادي يطلع فالسويسي شكون يستاهل يطلع”.

وغادي يتلاقى “دراغانوف” الجمهور ديالو اليوم مع العشرة ونص فمنصة سلا ضمن فعاليات مهرجان موازين الدورة 20.

التفاصيل تجدونها في الفيديو التالي من إنجاز: إلياس بواخريص