الرابور المصري أبيوسف أبدع بكل ما كتحمل الكلمة من معنى فالنسخة العربية ديال “هيب هوب سامفوني”، والأداء ديالو بهر وفنفس الوقت صدم عدد كبير من المغاربة لي كيبغيو موسيقى الراب، وكان كيصحابلهم بلي الراب المغربي هو أحسن راب كاين فالمنطقة، وعمرهم تسناو أنه مصر لي الراب عندهم بدا كينتاشر غي مؤخرا، تفرع الطرح. وهنا الأغلبية طرحو السؤال ديال كيفاش مصر جاو غي لبارح وسبقونا بسنوات ضوئية؟

مصر دولة كا تقدس الفن

والجواب على هاد السؤال ساهل، ببساطة مصر دولة لي كتقدس الفن، وكتعامل معاه بجدية، وعارفة القيمة والتأثير ديالو وهادشي من زمان ماشي تال دابا.
مصر دولة لي الفن بنسبة ليها صناعة وماشي لعب، ووسيلة لي يقدرو يدخلو منها لفلوس وينشرو الثقافة ديالهم، والدليل شكون فينا مكيفهمش اللهجة ديالهم، والأكثر من هادا شكون فينا مكانش كيضن بلي هاديك هي اللغة العربية أصلا.
مصر فلوقت لي المغرب والدول لخرين كانوا كيشوفو الفنان والفن معيورة هوما كانو كيعتابروهم نخبة وطبقة مثقفة، وعمر الفنان فمصر ما قال أنه هادشي حرام وكا يفكر يتوب منو، بلعكس الفنان فمصر كيفتاخر بلحرفة لي كيدير وكايعيش وكيموت وهو كيديرها.

الفنان المصري مثقف

الفنان فمصر ملي كيدخل شوية ديال لفلوس أول حاجة كيديرها هي شركة إنتاج، وماشي قهوة.
الفنان فمصر مثقف وعندو مواقف وملي كيهضر كيعبر عليها ويناقشو معاك اللي بغيتي من السياسة للدين لكرة القدم، وماشي فحال ديالنا اللي كتسولوا غي على المدونة كيبدا يدخل ويخرج عليك فلهضرة فحال إيلا سولتيه على تخصيب اليورانيوم.
شركات الإنتاج فمصر ملي كيفكرو يديرو شي عمل، أول خطوة كيبداو بيها هي يجبدو لفلوس من جيبهم ومكايتسناوش الدولة تضبر عليهم، حينث الفن عندهم استثمار ماشي سعاية.

الشعب المصري فنان

الشعب المصري كيتفرج ففيلم فالسينما، ومسرحية فالمسرح، وكيسمع موسيقى فلبلاتفورم ماشي كايتيليشارجيها.
الشعب المصري كيخلص من جيبو باش يتمتع بالفن ومكايتسناش مهرجان الشواطئ. الشعب المصري عمرو قاطع مهرجان فني واخا يكون لي كان.
مصر فلوقت لي حنا كلمة فن مزال معارفين حتا المعنى ديالها، محمد فوزي صاوب أول شركة إنتاج مصرية خاصة.
مصر فالوقت لي حنا كنقولو لناس الغيوان “سلاكط” أم كلثوم كتزعزع بصوتها مسرح “الأولمبيا” فباريس.
مصر فأي مرحلة وتحت أي نظام وكي ما كانت الظروف لي كادوز منها البلاد، الحاجة الوحيدة لي ثابتة هي أن الشعب فنان، فعادي جدا أنه الراب ملي وصلهم وخداوه بجدية غادي يفوتونا بسنوات ضوئية حينث كولشي على الساس.